Սահմանադրության նախագծի՝ երեխաների իրավունքների մասին հոդվածի սահմանումները մտահոգիչ են. վերլուծաբան

Tert.am-ը գրում է.

«Լույս» տեղեկատվական-վերլուծական կենտրոնի ղեկավար Հայկ Այվազյանը, Tert.am-ի հետ զրույցում խոսելով սահմանադրական փոփոխությունների վերաբերյալ, ասաց, թե սահմանադրության նախագծում մի ամբողջ հոդված նվիրվել է երեխաների իրավունքներին:

«Սահմանադրության նախագծի 36-րդ հոդվածը իրավական հիմքեր է ստեղծում Հայաստանում երեխաների առք ու վաճառքի շուկա ստեղծելու համար»,-ընդգծեց Հայկ Այվազյանը:

Նա նշեց, որ 1993 թվականին Հայաստանը վավերացրել է «Երեխաների իրավունքների մասին կոնվենցիան, 1996 թվականից Հայաստանում գործում է  «Երեխաների իրավունքների մասին» ՀՀ օրենքը:

«Արդյո՞ք Հայաստանում երեխաների իրավունքները ոտնահարվում են, արդյո՞ք երեխաները Հայաստանում ենթարկվում են մասսայական բռնությունների, խոշտանգումների, սեռական կամ այլ բնույթի շահագործման: Երեխաների հետ կապված ի՞նչ հիմնահարցերի կարգավորման  է ուղղված նոր սահմանադրության նախագծի երեխաների իրավունքներին նվիրված հոդվածը»,-հարցադրում արեց Հայկ Այվազյանը՝ շարունակելով, թե սահմանադրության նախագծի երեխաների իրավունքներին նվիրված 36-րդ հոդվածում տեղ գտած սահմանումների բացատրությունները ՀՀ որևէ օրենքում սահմանված չեն և դրանք շատ մտահոգիչ են:

Նրա խոսքով՝ երեխաների իրավունքների հանձնաժողովն ընդգծում է, որ երեխայի կողմից իր կարծիքն արտահայտելու համար տարիքային որևէ սահմանափակում չկա: Ավելին, նշված է, որ երեխան պարտավոր չէ խորը գիտելիքներ ունենալ իրեն վերաբերող հարցերում, այլ պետք է իմանա այնքան, որքան որ բավարար է իր կարծիքն արտահայտելու համար:

Հայկ Այվազյանը մտահոգիչ է համարում նաև այն, որ երեխային ընտանիքից հեռացնելու որոշումը, որն ընտանիքում ենթարկվում է ոչ պատշաճ ուշադրության, կարող է իրականացվել երեխայի, նրա ընտանիքի մյուս անդամի կամ համայնքի այլ անդամի բողոքի հիման վրա: