«Իսլամական պետություն» ահաբեկչական կազմակերպության զինյալները ոչնչացրել են «Ալ Լաթի առյուծ» բացառիկ արձանը

«Իսլամական պետություն» ահաբեկչական կազմակերպության զինյալները Սիրիայի Պալմիրա քաղաքում ոչնչացրել են 3 մետր բարձրություն և 15 տոննա ծանրություն ունեցող «Ալ Լաթի առյուծ» բացառիկ արձանը, որը հայտնաբերվել է 1977թ. լեհ հնէաբանների կողմից Ալ Լաթ արաբական նախաիսլամական աստվածուհու տաճարում: Արձանի ստեղծումը թվագրված է Ք.Ա. առաջին դարում: 
Թեպետ սիրիական բանակային ստորաբաժանումները և պատմամաշակութային կոթողների պահպանության պատասխանատուները Պալմիրայից հեռանալուց առաջ հնագիտական արժեքների մի մասը կարողացել են տեղափոխել քաղաքից, իսկ վերոնշյալ արձանը փորձել են թաքցնել մետաղյա ծածկի և ավազով լցված պարկերի տակ, այնուամենայնիվ, իսլամականներին հաջողվել է հայտնաբերել այն և ոչնչացնել: Ենթադրվում է, որ այդ ոճրագործության տեսագրությունը համացանցում կտարածվի առաջիկայում: