«Քարդաշյաններն ու Քանյե Ուեսթը մեծ հետաքրքրությամբ էին լսում հայկական երգերը, վայելում էին քար լռության մեջ». Գուրգեն Դաբաղյան

Երգիչ Գուրգեն Դաբաղյանն ու դուդուկահար Գրորգ Դաբաղյանն այսօր հանդիպում են ունեցել Քարդաշյանների ընտանիքի հետ՝ Քիմին, Քլոյեին, Քանյե Ուեսթին և մյուսներին ծանոթացնելու հայկական ժողովրդական երաժշտությանը: BlogNews.am-ի հետ զրույցում Գուրգենը մանրամասներ պատմեց հանդիպումից, որը կայացել է Վահագնի թաղամասում՝ Վահագն Հովնանյանի  նախաձեռնությամբ:

«Հանդիպումն անցավ մտերմիկ պայմաններում, ինձ խնդրեցին, որ ինֆորմացիա տամ հայկական երաժշտության մասին և  մի քանի կատարումներով ներկայանամ, ու սիրով երգեցի: Վաղը վիդեոտարբերակով կներկայացնեմ՝ ինչպես էի կենդանի՝ դուդուկի ուղեկցությամբ կատարում «Հորովել», իսկ Քարդաշյաններն ու Քանյե Ուեսթը մեծ ուշադրությամբ լսում էին: Ինչպես ես հասկացա, նրանք կամ շատ քիչ էին ծանոթ հայկական երաժշտությանը, կամ ընդհանրապես ծանոթ չէին, սակայն մեծ հետաքրքրությամբ էին լսում, վայելում էին քար լռության մեջ: Կարծում եմ՝ շատ կարևոր էր, որ նրանք լսեին իսկական հայկական ժողովրդական երաժշտություն»,- պատմեց Գուրգենը:

Երգչի փոխանցմամբ՝ Քարդաշյաններին նվիրել է իր տեսասկավառակը, նրա  հորեղբայրն էր դուդուկ է նվիրել հյուրերին:  «Ես ասացի, որ սկավառակի մեջ կա, թե ինչպես եմ Արարատի գագաթին՝ հայկական եռագույնն ուսերիս երգել ու խնդրեցի, որ ուշադրություն դարձնեն այդ հատվածին: Նրանք շատ զարմացան և ասացին, որ մեծ հետաքրքրությամբ կդիտեն»,- նշեց Գուրգենը:

Նրա փոխանցմամբ՝ Քարդաշյաններից ու Քանյե Ուեսթից շատ լավ տպավորություններ է ստացել: «Մարդկային առումով տպավորութունս շատ լավ էր: Արտառոց ոչ մի բան չնկատեցի. շատ հասարակ, հարգանքով, ամեն առումով մարդկային էին: Իրենք համաշխարհային հայտնիություն ունեցող դեմքերն են, բայց սովորական մարդ են: Աստղային վիճակներ չեմ նկատել, նորմալ, ազատ շփվում էինք ու չկար որևէ լարվածություն: Դա այն է, ինչ ես տեսա»,- նկատեց երգիչը:

Գուրգենը հայտնեց, որ վերջում իրեն են մոտեցել Քարդաշյանների աշխատակազմի խմբի ղեկավարը, պրոդյուսերըները, շնորհակալություն հայտնել ու փոխանակվել կոնտակտներով: Երգիչը չի բացառում, որ հնարավոր է՝ հետագայում կրկին հանդիպեն, քանի որ ամեն բան անցել է շատ ջերմ, լավ տպավորություններով բաժանվել են:

Ամալյա Հովհաննիսյան