Հայ առաքելական բոլոր եկեղեցիներում այս երեկո կմատուցվի Ճրագալույցի Սուրբ պատարագ

Yerkir.am-ը գրում է.

Հայ առաքելական բոլոր եկեղեցիներում այս երեկո կմատուցվի Ճրագալույցի Սուրբ պատարագ, որով ազդարարվում է Քրիստոսի հրաշափառ Հարության ավետիսը. «Քրիստոս յարեաւ ի մեռելոց, օրհնեալ է յարութիւնն Քրիստոսի»: Այս ավետիսով ավարտվում է Մեծ պահքը:

Հարության տոնը սկսվում է այսօր երեկոյան, քանի որ ըստ Եկեղեցական կարգի՝ երեկոյան ժամերգությունից հետո է սկսվում նոր օրը: Ճրագալույցի Սբ Պատարագ տարին 2 անգամ է մատուցվում` Սբ Ծննդյան և Սբ Հարության տոներին: Ճրագալույց նշանակում է` ճրագ (մոմ) լուցանել, այսինքն` վառել: Այդ օրը` երեկոյան, մարդիկ եկեղեցում վառված ճրագներն իրենց հետ տուն են տանում: Այն խորհրդանշում է աստվածային լույսը, եկեղեցու օրհնությունը: