Միջին վիճակագրական ֆեյսբուքահայուհու էվոլյուցիան

Միջին վիճակագրական ֆեյսբուքահայուհու ստատուսների մոտավոր ժամանակագրությունը.

Փուլ 1. Ես հրաշք եմ, անհասանելի թագուհի, թույն դեմք եմ, քաղաքի գլամուրային սրճարաններ եմ գնում ընկերուհիներիս հետ, բոլոր տղամարդիկ ոչխար են: Լուսանկարը՝ ես ընկերուհիներիս հետ զուգարանում, ակումբում, սրճարանում, վերելակում, մոլում, Վրաստանում: Հետևություն. բոլոր տղամարդիկ ոչխար են, նրանք ինձ արժանի չեն: Ընկերուհիները հաստատում են:

Փուլ 2. Ես սիրահարվել եմ: Էջս եմ լցնում բոլոր այն ցիտատներով, որտեղ կան «սեր», «հավերժ», «խենթի պես» բառերը: Լուսանկարը՝ ես ու ՆԱ զուգարանում, ակումբում, մոլում, Վրաստանում: Հետևություն. բոլոր ընկերուհիները նախանձ փչացածներ են: Ընկերս հաստատում է:

Փուլ 3. Մենք բաժանվել ենք: Պարույր Սևակ, Պաոլո Կոելյո, տիեզերքի և երազանքների իրականացման անմիջական կապի մասին ցիտատներ, որոնց կեսն էլ չեմ հասկանում, «եթե նա հեռացել է, ուրեմն փթիր է» ոճի ստատուսներ: Պետք է մի քանի ստատուս գրել ընկերուհիների հետ բարիշելու համար: Բոլոր տղամարդիկ ոչխար են:

Փուլ 4. Խնջույքներ, ակումբներ, շուրջօրյա «կայֆավատ»: Թող բոլորը տեսնեն, թե մենակ ինչ լավ եմ ինձ զգում:

Փուլ 5. Լավ տղաներն ակումբներ չեն գնում: Լավ տղաները փող են աշխատում, երեխաներ են ունենում և սիրում են համեղ ուտելիքներ: Իմ էջում խոհարարական բաղադրատոմսեր են պակասում: Լուսանկարները՝ փիսիկներ, պուպուշ երեխաներ, ուտելիք:

Փուլ 6. Գտել եմ այն դժբախտին, ով պատրաստ է ամուսնանալ ինձ հետ: Այո, իմ էջում պակասում են հարսանիքի մասին նյութերն ու նկարները: Լուսանկարները՝ ես և նախանձից պայթող թարախ ընկերուհիներս, պատրաստվում ենք իմ հարսանիքին:

Փուլ 7. Հիմա ես ամուսնացած եմ: Միլիոնավոր անդուր և սարսափելի լուսանկարներ հարսանիքից, 10 պրոֆեսիոնալ լուսանկար: Լուսանկարներ մեղրամսից:

Փուլ 8. Ուտելիքի բաղադրատոմսեր, որոնք ամուսինս միայն երազում կտեսնի: Անգամ ոչ ռեստորանում, քանի որ դուք հիմա ընդհանուր բյուջե ունեք՝ նրա փողերն ու նրա փողերը: 

Փուլ 9. Սիրելիս, դու հայրիկ ես դառնալու: Share արած գրառումներ մայրիկների խմբերից, անիմաստ և ոչ այդքան խորհուրդներ, ցիտատներ երեխաների մասին և պստիկների պուպուշ նկարներ, փիսիկներ, շունիկներ, ջայլամիկներ և այլն: Լուսանկարը՝ ես և փորիկս, ես և ամուսինս, ամուսինս համբուրում է փորիկս: Դրան հաջորդում են երեխայի միլիարդավոր նկարները՝ սկսած ծնվելու առաջին իսկ պահից:

Փուլ 10: 8 և 9 կետերի կրկնություն, պարբերաբար կրկնվող նոստալգիա նախկին կյանքի հանդեպ, փիլիսոփայական ստատուսներ կյանքի իմաստի և ծերության մասին: