Էդուարդ Շարմազանովը հանդիպել է Լատվիայի ԱԳՆ պետքարտուղարի հետ

Tert.am-ը գրում է․

ՀՀ Ազգային ժողովի փոխնախագահ Էդուարդ Շարմազանովը մարտի 13-ին Ռիգայում հանդիպում է ունեցել Լատվիայի Հանրապետության ԱԳՆ պետքարտուղար Անդրեյ Պիլդեգովիչի հետ:

Ինչպես հայտնում են ՀՀ Ազգային ժողովից՝ կողմերը քննարկել են երկկողմ օրակարգին վերաբերող հարցերի լայն շրջանակ: Զրուցակիցները բարձր են գնահատել պարբերական քաղաքական երկխոսության ներկայիս մակարդակը: Նրանք կարևորել են երկկողմ առևտրատնտեսական համագործակցության հետագա զարգացման համար հայ-լատվիական միջկառավարական հանձնաժողովի երկրորդ նիստի անցկացումը Երևանում` ընթացիկ տարվա երկրորդ կիսամյակում:

Կողմերը քննարկել են նաև Հայաստան-Եվրամիություն հարաբերությունների հետագա խորացումը` կարևորելով Լատվիայի ԵՄ խորհրդի նախագահության շրջանակներում Արևելյան գագաթաժողովի անցկացումը մայիսի 21-22ը:

ՀՀ ԱԺ փոխնախագահը և Լատվիայի ԱԳՆ պետքարտուղարը մտքեր են փոխանակել տարածաշրջանային և միջազգային անվտանգությանն առնչվող մի շարք հարցերի վերաբերյալ: Այդ կապակցությամբ ՀՀ ԱԺ փոխնախագահը ներկայացրել է ԼՂ խաղաղ կարգավորման գործընթացի ներկայիս փուլը: