Իվետա Տոնոյանը դուրս է եկել ԲՀԿ-ից և կշարունակի մնալ Գագիկ Ծառուկյանի մամուլի քարտուղար

Tert.am-ը գրում է․

Ակտիվ քաղաքականությունից այսօր հեռացած, «Բարգավաճ Հայաստան» կուսակցության արդեն նախկին նախագահ Գագիկ Ծառուկյանի մամուլի քարտուղար, «Բարգավաճ Հայաստան» կուսակցության անդամ Իվետա Տոնոյանը կուսակցությունից հեռանալու դիմում է գրել: Նա շարունակում է մնալ Գագիկ Ծառուկյանի մամուլի քարտուղար:

Այս մասին հայտարարեց Իվետա Տոնոյանը՝ Tert.am-ի հետ զրույցում։

 Նա հրաժարվեց պատասխանել հարցին, թե ինչ է լինելու կուսակցության գրասենյակների հետ, որոնք վարձակալվել են Գագիկ Ծառուկյանի ֆինանսական միջոցներով:

«Քանի որ այդ հարցը վերաբերում է կուսակցությանը, ապա «Բարգավաճ Հայաստան» կուսակցության մասով այլևս կոմպետենտ չեմ պատասխանել որևէ հարցի, անգամ եթե դա վերաբերում է տեխնիկական հարցերի»,-ասաց նա։

Նա ավելացրեց, որ ինչպես իր ելույթում հայտարարել էր Գագիկ Ծառուկյանը, վերջինս շարունակելու է երկրում իրականացնել  բարեգործություններ՝ եկեղեցիների կառուցման, շինարարության տեսքով, և այլն. «Եվ դա ենթադրում է, որ պարոն Ծառուկյանը շարունակելու իր  բարեգործական գործունեությունը, այդ թվում՝ նաև Գագիկ Ծառուկյան բարեգործական հիմնադրամի շրջանակներում»:

Ինչ վերաբերում է հարցին, թե արդյո՞ք բարեգործությունները նախկին ծավալով կշարունակվեն և նույն ծրագրային ուղղվածություններով, ապա Իվետա Տոնոյանը  ասաց, որ ծավալների, «միգուցե նաև ընդլայնվող շրջանակների մասին» այս պահին չի կարող ասել:

Կուսակցության գրասենյակի հետ կապված՝ զանգահարեցինք նաև կուսակցության մամուլի քարտուղար Տիգրան Ուրիխանյանին։ Վերջինս, սակայն, չպատասխանեց հեռախոսազանգերին:

 Հիշեցնենք, որ նա օրեր առաջ  հայտարարել էր, որ այլևս իրեն իրավասու չի համարում հանդես գալ «Բարգավաճ Հայաստանի» անունից: