Վերանայվող ԵՄ հարևանության քաղաքականությունում ՀՀ դերն ամենահասկանալին է. Ա. Զաքարյան

Tert.am-ը գրում է․

ԵՄ Արևելյան գործընկերության շրջանակներում Հայաստանի դերը ամենահասկանալին է և պարզն է: Tert.am-ի հետ զրույցում նման կարծիք հայտնեց ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը՝ պատասխանելով հարցին, թե ԵՄ-ի կողմից  վերանայվող  և անդամ երկրների նկատմամբ տարբերակված մոտեցում ենթադրող «հարևանության քաղաքականությունում»  ինչ դերակատարություն է ունենալու Հայաստանը:

«Հայաստանն ունի ընդգծված շահեր, որոնք գտնվում են հայ-ռուսական տիրույթում, ունի շահեր, որոնք ենթադրում են Հայաստան-ԵՄ հարաբերությունների զարգացում: ՀՀ-ն  ունի արժեքային համակարգ, որը հայ-ռուսական համագործակցության  և արժեքային համակարգ, որը Հայաստան-ԵՄ համագործակցության  տիրույթում է: Եվ մենք պետք է համադրենք դրանք, իսկ ԱլԳ-ում հարևանության շրջանակներում մեր դերն է՝ գտնել միջակայքերը, որտեղ համադրվում են և՛ արժեքները, և՛ շահերը: Մենք դա կարող ենք և պատրաստ ենք անել»,-հայտարարեց Արտակ Զաքարյանը:

Հիշեցնենք, որ ԱԼԳ-ի՝ հետայսու տարբերակված մոտեցման մասին հայտարարել էր  Եվրամիության արտաքին հարցերով բարձր ներկայացուցիչ Ֆեդերիկա Մոգերինին: Այս մասին գրում է 168.am-ը: 

ԱԺ արտաքին հարաբերությունների հանձնաժողովի նախագահը, ի պատասխան հարցի, թե ի՞նչ է ենթադրում տարբերակված մոտեցումը, ասաց, որ Հայաստանի նկատմամբ պետք է լինի այլ մոտեցում, Վրաստանի՝ այլ, Մոլդովայի, Բելառուսի, Ուկրաինայի՝ այլ։

Հարցին, թե արդյո՞ք անդամ երկրների նկատմամբ լավ, ավելի լավ, վատ, ավելի վատ, նման «աստիճանական» վերաբերմունք է լինելու, Արտակ Զաքարյանը պատասխանեց, որ այդ վերաբերմունքը անդամ երկրներն են որոշում, թե ինչ կերպ է շարունակվելու համագործակցությունը:

«Նախկինում ինչպես էր, բոլոր անդամ  6 երկրների համար կային խաղի մեկ՝ միասնական կանոններ, և երկրները փորձում էին այդ խաղի կանոնների մեջ տեղավորել իրենց տեսլականն ու պետական, արժեքային ու քաղաքական շահերը»,-ասաց Արտակ Զաքարյանը: