Ծառուկյանի խոսքի տրամաբանական կառուցվածքը կաղում էր, իսկ ներքին հակասություններն աղաղակող էին. Գ. Սահակյան

Գագիկ Ծառուկյանի հրավիրած երեկվա քաղաքական խորհրդաժողովի արձագանքները, փաստորեն, չուշացան։ Բացի այն, որ չուշացան, եղան շատ կտրուկ։ Գալուստ Սահակյանն է քիչ առաջ հարցազրույց տվել ու ահագին խիստ է խոսել։ Եթե Ծառուկյանի մասին խոսելիս մինչ օրս հանրապետականները զուսպ էին ու ավելի շուտ արձագանքում էին արձագանքելու համար, ապա Գալուստի՝ այս անգամվա խոսքը կտրուկ տարբերվում է նախորդներից իր կոշտությամբ։ 
Գալուստը պնդում է, որ Ծառուկյանի տեքստի տրամաբանական կառուցվածքը կաղում էր, իսկ ներքին հակասություններն աղաղակող էին: Ասում է, որ տպավորություն է ստացել, որ մի քանի հոգի են աշխատել ու մեխանիկորեն կպցրել իրար: «Օրինակ՝ նրանցից մեկը պնդում է, որ կիսապատերազմական պայմաններում, երբ սահմանի վրա ամեն օր կրակում են, երբ հակառակորդը սպառնում է նոր լայնամասշտաբ պատերազմով, չի կարելի երկրի կառավարման մոդելը փոխել: Մինչդեռ նույն ելույթում՝ մի քանի տող վերև, մյուս հեղինակը պնդում է, որ այսօր, նման իրավիճակում կարելի է ու պետք է գնալ խոշոր հանրահավաքների, հզոր հանրահավաքների և այլն: Նման խայտառակ հակասությունները զվարճալի կլինեին, եթե այսքան անտրամաբանական չլինեին»,-ասում է Սահակյանը:

Ապա Գալուստը հավելում է, որ իր կարծիքով՝ ՀՀԿ գործադիր մարմինն իր գալիք նիստերից մեկում կքննարկի Գագիկ Ծառուկյանի կողմից հնչեցված այդ մի քանի դրույթները և քաղաքական արձագանք կտա դրանց:

Մի խոսքով, սպասենք նոր զարգացումների։ Ծառուկյանի խոսքը խիստ է խոցել իշխանավորներին։