Ռադայի պատգամավորներն առաջարկում են զրկել Յանուկովիչին Ուկրաինայի նախագահի կոչումից

Lurer.com-ը գրում է.

Ուկրաինայի Գերագույն ռադայի պատգամավորները ներկայացրել են խորհրդարանին մի օրինագիծ, որի համաձայն առաջարկվում է զրկել Ուկրաինայի նախկին նախագահ Վիկտոր Յանուկովիչին նախագահի պատվավոր կոչումից: Այս մասին հայտնել է ՌԻԱ Նովոստին:

Ուկրաինական օրենսդրության համաձայն՝ Ուկրաինայի նախագահները պահպանում են նախագահի պատվավոր կոչումը մինչև կյանքի վերջ:

«Ուկրաինայի նախագահի կոչումը պաշտպանվում է օրենքով և պահպանվում է ցմահ, եթե միայն նա չի հեռացվել պաշտոնից նրան անվստահություն հայտնելու կարգով»,- ասված է երկրի սահմանադրության մեջ:

Օրենքի համապատասխան նախագիծը հրապարակվել է խորհրդարանի կայքում ուրբաթ օրը: Տվյալ օրենքի նախագծի նախաձեռնողներից մեկը «Ռադիկալ կուսակցության» առաջնորդ Օլեգ Լյաշկոն է:

Մասնավորապես՝ խորհրդարան է մտցվել «Վիկտոր Յանուկովիչին Ուկրաինայի նախագահի կոչումից զրկելու մասին օրենքի նախագիծը»: