Եթե ամեն ինչին այդքան վատ տրամադրվեք, տխուր դեմքով քայլեք, դրանից երկրի վիճակը չի լավանալու

Երևի ոչինչ էլ չգրեի այս թեմայով, եթե կոլեգաներիցս մեկն ինձ տեսնելով չասեր՝ երկրի տխուր վիճակն ու քո պայծառ դեմքը: 
Ի դեպ, այդ պահին նոր էի եկել աշխատանքի ու դեռ չէի էլ հասցրել ծանոթանալ հերթական օրվա հերթական տխուր լրահոսին՝ առաջին անհրաժեշտության ապրանքների թանկացում, ճգնաժամ, ճգնաժամ ու էլի ճգնաժամ:
Հասկանում եմ, որ երկրի սոցիալ-տնտեսական վիճակը, մեղմ ասած, լավ չէ, առջևում Ամանոր է, մարդիկ մտածում են՝ ոնց անեն, ամեն ինչ հասցնեն, էլ չեմ ասում՝ վարկ ունեցողների մասին, բայց այսքան խնդիրներին գումարվում է նաև մեր ազգին բնորոշ հոռետեսությունը, թե ամեն ինչ էլ ավելի է վատանալու՝ թողենք, գնանք ու պրծնենք էս երկրից:

Եթե ամեն ինչին այդքան վատ տրամադրվեք, տխուր դեմքով քայլեք, դրանից երկրի վիճակը չի լավանալու, ձեր տոնական սեղանին խոզի բդի կամ մեկ այլ սննդամթերքի բացակայությունից դժվար թե էական փոփոխություն լինի: Մեկ-մեկ էլ եկեք ուրախանանք ու Աստծուն շնորհակալ լինենք մեր ունեցածով՝ թեկուզ նրանով, որ ապրում ենք, առողջ ենք ու կյանքում ունենալու ենք թե ուրախ և թե տխուր պահեր: