Չինաստանում փրկել են նորածնի, որին մայրը գցել էր զուգարանը

1in.am-ը գրում է․

Չինաստանի փրկարար ծառայության աշխատակիցները կոյուղատար խողովակից դուրս են բերել նորածին երեխայի, որին մայրը զուգարանն էր գցել ծննդաբերությունից հետո:

Դեպքը տեղի է ունեցել Չինաստանի հյուսիսարևմտյան Շենսի նահանգում: Երեխան գտնվել է խողովակի մեջ ու փրկվել է այնտեղ հայտնվելուց քիչ անց:

Անցորդներն ուշադրություն են դարձրել կոյուղատարից լսվող ճիչերին և կանչել են փրկարարների, հայտնում է The Mirror-ը:

Նորածնին կոյուղատարից հանելը հեշտ չի եղել: Հրշեջները քիչ ջանք չեն գործադրել, որպեսզի երեխան չտուժի մետաղական կոնստրուկցիայի ապամոնտաժման հետևանքով:

Դեպքի վայր ժամանած բժիշկները հայտնել են, որ մայրը տղային զուգարան է գցել ծննդաբերությունից անմիջապես հետո, երբ դեռ երեխայի պորտալարը մինչև վերջ կտրված չի եղել:

Երեխան հիմա գտնվում է հիվանդանոցում: Բժիշկները ոչ մի արատ չեն հայտնաբերել ու ասել են, որ երեխայի առողջությունը վտանգված չէ:

Ներկայում ոստիկանությունը որոնում է նորածնի մորը: