Եթե խելագարվել, ուրեմն` հայտնիների պես
15:48 , 5 դեկտեմբեր, 2014Newmag.am-ը գրում է․
Բժիշկ. «Ձեր բախտը բերեց»:
Հիվանդ. «Ես կապաքինվե՞մ»:
Բժիշկ. «Օ, ոչ, բայց հիվանդությունը կկոչեն Ձեր պատվին»:
Ստենդալի համախտանիշ
Շատ զվարճալի «հիվանդություն» է, թեև դրանով տառապողների համար ամենևին էլ այդպես չէ: Այս սինդրոմն արտահայտվում է գլխապտույտներով, ուշագնացություններով, սրտի զարկերի արագացմամբ, արվեստի գործերի կամ գեղեցիկ բնության գրկում` երբեմն նույնիսկ զգայապատրանքներով: Պատկերացնու՞մ եք՝ մտնում եք Էրմիտաժ և ուշագնաց լինում ամենազոր արվեստից:
Համախտանիշն անվանումը ստացել է Ստենդալի գրքերից մեկից, որտեղ գրողը նկարագրում էր իր զգացողությունները` Ֆլորենցիա այցի ժամանակ:
Երբ ես դուրս էի գալիս Սուրբ Խաչ եկեղեցուց, սիրտս սկսեց արագ խփել, ինձ թվաց՝ քայլելիս ուր որ է կընկնեմ: Ես տեսել էի կրքի էներգիայով ստեղծված արվեստի գլուխգործոցներ, որոնցից հետո ամեն ինչ անիմաստ էր թվում, փոքր, սահմանափակ, – գրում է նա:
Ալիսայի համախտանիշ` հրաշքների աշխարհից
Այս համախտանիշով մարդկանց համար աշխարհը միայն առաջին հայացքից է հրաշքներով լի: Դժվար է ապրել, երբ միշտ թվում է, թե սեղանի վրա դրված խնձորն ահռելի չափի է, իսկ մարդիկ այնքան փոքր, կարծես լուցկու տուփի չափ լինեն: Նրանք չեն կարող տեսնել առարկան` իրական չափսերով, ամեն ինչ չափազանց մեծ կամ չափազանց փոքր է թվում:
Վան Գոգի համախտանիշ
Ձեզանից շատերն այժմ մտածեցին հայտնի նկարչի ականջի մասին: Եվ ճիշտ էլ արեցիք: Այս համախտանիշն արտահայտվում է վիրահատություն կատարելու համառությամբ: Երբեմն ավելի վատ է, երբ հիվանդն ինքն է իրեն վիրահատում:
Պիտեր Պենի համախտանիշ
Պատկերացրեք 25-ամյա մի երիտասարդի, ով անընդմեջ խուսափում է աշխատանքից, ապրում է ծնողների հետ և իր ամբողջ ժամանակն անց է կացնում իր ընկերների հետ, որոնց 18-ը հազիվ է լրացել: Ձեր առջև հավերժ երեխա է. ոչ մի պատասխանատվություն, միայն խրախճանքներ: Հետաքրքիր է՝ աղջիկների մոտ նման համախտանիշ չի նկատվում:
Դիոգենեսի համախտանիշ
Դիոգենեսը հայտնի է իր տակառով, որի մեջ մտավ` ապրելու: Նա դրսևորեց իրեն որպես սոցիոպատ և մարդատյաց: Այս սինդրոմը` որպես համախտանիշ գրանցվեց 1966 թվականին: Այն դրսևորվում է անձի՝ ինքն իր հանդեպ արհամարհանքով, շրջակա միջավայրից մեկուսացմամբ, անտարբերությամբ և ամոթի բացակայությամբ:
Դորիան Գրեյի համախտանիշ
Այս համախտանիշով տառապում են ակտիվորեն երիտասարդանալ փորձողները, ովքեր իրենց ամբողջ ջանքն ու եռանդն ուղղում են արտաքին տեսքը երիտասարդ պահելու վրա: Այս մարդիկ երիտասարդ տեսք ունենալուն վերաբերվում են որպես պաշտամունքի: Այն արտահայտվում է երիտասարդին հատուկ հագուստի, ոճի, կոսմետիկ միջոցների չարդարացված կիրառմամբ և պլաստիկ վիրահատությունների չարաշահմամբ: Այս համախտանիշի ավարտը դեպրեսիաներն են կամ ավելի վատ` ինքնասպանության փորձերը:
Ադելի համախտանիշ
Այսպես է կոչվում երկարատև, անպատասխան մնացած սիրո մոլուցքը: Համախտանիշն իր անունը ստացել է իրական պատմությունից: Վիկտոր Հյուգոյի դուստրը՝ Ադելը, ծանոթանում է անգլիացի մի սպայի՝ Ալբերտ Փինսոնի հետ: Ադելը սիրահարվում է նրան և ենթադրում, որ հենց Փինսոնն է իր կյանքի միակ տղամարդը: Դժվար է ասել՝ սպան անսիրտ և անզգա խաբեբա էր, թե կուրորեն սիրահարված աղջկա զոհ: Փաստն այն է, որ Փինսոնը չէր պատասխանում աղջկա զգացմունքներին. չօգնեցին ո՛չ աղջկա գեղեցկությունը, ո՛չ էլ նրա հոր խոսքերը: Ադելը հետապնդում էր նրան աշխարհով մեկ, ստում բոլորին, որ նրանք ամուսնացած են, մինչդեռ սպան ամուսնացած էր ուրիշ կնոջ հետ: Ի վերջո, Ադելը խելագարվում է և մահանում 1915 թվականին:
Ամբողջական հոդվածը կարող եք կարդալ այստեղ