Հեռուստատեսության թվայնացման վերջնաժամկետը հուլիսի 10-ն է

Armnewstv.am-ը գրում է․

Հայաստանում թվային հեռարձակման ներդրման գործընթացը մոտենում է ավարտին: Եվս 8 ամիս և անալոգային հեռուստատեսությունը կդառնա պատմություն, տեղը զիջելով թվայնացված հեռուստատեսությանը: Ծրագրի ամբողջական արժեքը 6 միլիարդ 922 միլիոն դրամ է, որից մեկ միլիարդը վերադարձվելու է պետբյուջե` հարկերի տեսքով: Շվեդական էրիքսոն կազմակերպությունն արդեն առաքել է սարքավորումների ամբողջ փաթեթը, դրանք մաքսազերծվել են, պահեստավորվել ու խմբաքանակներն ուղարկվում են մարզային կայաններ:

Եվ ամենակարևորը: Թվայնացված հեռուստածրագրեր ունենալու համար անհրաժեշտ է սարք, որը կընդունի ազդանշանը: Այն կարելի է ձեռքբերել 20-ից 100 դոլարի սահմանում: Կառավարությունն անապահով ընտանիքներին աջակցելու համար մշակել է հեռուստահեռարձակման սոցիալական ծրագիր: 100 000 ընտանիք կկարողանա օգտվել փաթեթից: Մայրաքաղաքում նախատեսվում է իրականացնել թվային 18 անվճար հեռարձակում, յուրաքանչյուր մարզում կլինեն մեկական ալիքներ, սակայն հեռարձակվող ծրագրերի միջին թիվը կրկնապատկվելու է:

Թվայնացումից հետո որոշ ժամանակ կպահպանվի անալոգային հեռարձակումը` անհրաժեշտ փոփոխություններն անելու համար: Մինչև այդ առաջին փորձարկումը գոհացուցիչ է: Էկրանին խզումներ ու երկրորդական ալիքներ չեն հայտնվի, պատկերը հեռուստադիտողին կհասնի ստուդիական որակով: Թվայնացման համար հեռուստաընկերությունները նույնպես պետք է ներդրում անեն: Ներկրվող հեռուստացույցները չունեն հայերեն և անհրաժեշտ կլինի տրանսլիտով գրել հաղորդումների անվանումները:

Հարցն օրենսդրական կարգավորման կարիք ունի: Կառավարությունը մշակելու է նախագիծ, որ ներկրվող հեռուստացույցներն ունենան նաև հայերեն մենյու և հասկանան հայերեն տառերը: Կարևոր է, որ թվայնացումից գոհ կլինեն հեռուստադիտողը, որը կդիտի ավելի որակյալ հեռարձակում և հեռուստաընկերությունները` որոնց աշխատանքը ջուրը չի ընկնի և հաղորդումը սպառողին կհասնի գերազանց պատկերով:

Տեսանյութն՝ այստեղ