Պուտինը «սև ուժի քաղաքական գործիչ» է. Վախթանգ Կիկաբիձե
18:11 , 4 հոկտեմբեր, 2014
1in.am-ը գրում է.
Վրաստանի ժողովրդական արտիստ Վախթանգ Կիկաբիձեն ուկրաինական «Սեգոդնյա» պորտալի հետ զրույցում Ռուսաստանի նախագահ Վլադիմիր Պուտինին անվանել է «սև ուժի քաղաքական գործիչ»: Այս մասին տեղեկացնում է tvrain.ru-ն:
«Այդ մարդուն ես կարող եմ ասել, որ նա սև ուժի քաղաքական գործիչ է: Ու մինչ նա կապրի իր հավակնություններով, նա ամբողջ ժամանակ կսպառնա ինչ-որ երկրների, համակարգերի: Նա նվաճող է»,- ասել է Կիկաբիձեն ի պատասխան այն հարցի, թե հնարավորություն ունենալու դեպքում ինչ կասեր Պուտինին:
Արտիստը նշել է, որ կմասնակցեր Կիևի կողմից Ուկրաինայի արևելքում հատուկ գործողությանը, եթե լիներ երիտասարդ: Ընդ որում՝ նա ընդգծել է, որ երկու եղբայրական ժողովուրդների միջև թշնամանքը անմարդկային է ու անթույլատրելի:
Բացի այդ՝ Կիկաբիձեն հայտնել է Կիևում բարեգործական երեկոյի անցկացման մասին՝ ի հիշատակ «Երկնային հարյուրյակի»:
«Ես միշտ եմ պատրաստ ելույթ ունենալ Կիևում՝ ձեր երկրի բոլոր հայրենասերների համար, ու ցանկանում էի դա անել հենց Մայդանում: Իմ համերգային ծրագիրն արդեն պատրաստ է, ու ես ցանկանում եմ գալ ոչ միայն Կիև, այլև ձեր երկրի շատ այլ քաղաքներ, սակայն դեռ առողջությունս թույլ չի տալիս»,- հայտնել է Կիկաբիձեն: