Ինչպե՞ս պետք է հղիները պաշտպանվեն ամռան շոգից. խորհուրդներ` գինեկոլոգից
15:12 , 30 հունիս, 2014Panorama.am-ը գրում է.
Օդի բարձր ջերմաստիճանի, ուլտրամանուշակագույն ճառագայթների բացասական ազդեցությունը մեղմելու համար հղիներին խորհուրդ չի տրվում երկար ժամանակ գտնվել կիզիչ արևի տակ: Ինչպես այսօր լրագրողների հետ հանդիպման ժամանակ ասաց մանկաբարձ-գինեկոլոգ Պավել Սոցկին, հղիները պետք է առավել ուշադիր լինեն և հետևեն իրենց ինքնազգացողությանը:
Նրա խոսքերով` հղիները առաջին հերթին պետք է օրվա ռեժիմ ունենան:
«Նախ` ամռան շոգ օրերին հղիները պետք է զբոսնեն առավոտյան կամ երեկոյան ժամերին, քանի որ արևի ճառագայթների ուղղակի ազդեցությունը ցանկալի չէ: Հղիների ճնշումը, հեմոգլոբինը սովորականից ցածր է լինում, ուստի արևահարությունից նրանց ինքնազգացողությունը կվատանա»,- ասաց Պավել Սոցկին:
Նրա խոսքերով` արևահարությունից խուսափելու համար հղիները պետք է բաց գույնի հագուստ կրեն, քանի որ մուգ հագուստը կլանում է արևի ճառագայթները, ինչի արդյունքում մեծանում է արևահարության հավանականությունը:
Անդրադառնալով սննդակարգին, գինեկոլոգը նշեց, որ հղիները օրվա ընթացքում պետք է ուտեն հինգից-վեց անգամ` փոքր չափաբաժնով: Ըստ նրա` սխալ է, որ օրվա ընցացքում մեկ կամ երկու անգամ են ուտում, քանի որ այդ ընթացքում ուտում են ամբողջ օրվա համար նախատեսված չափաբաժինը: Մինչդեռ հաճախակի ուտելը կնվազեցնի և սովի զգացումը, և թույլ չի տա, որ ծննդաբերությունից հետո ավելորդ քաշ հավաքեն:
Ուտելիքը պետք է հարուստ լինի վիտամիններով, միկրոէլեմենտներով, ինչպես նաև պետք է սպիտակուց պարունակի: Ամռանը լավ է ուտել մրգեր, բանջարեղեն:
Ամբողջական հոդվածը կարող եք կարդալ այստեղ