Էբոլա մահացու տենդի համաճարակը միջազգային թափ է ձեռք բերում. ԱՀԿ
20:37 , 27 հունիս, 2014
1in.am-ը գրում է.
Առողջապահության համաշխարհային կազմակերպությունը (ԱՀԿ) նախազգուշացնում է՝ Էբոլա տենդը դուրս է գալիս վերահսկողությունից, և պետական սահմաններն ի վիճակի չեն զսպել համաճարակի «սանձերը», որն արդեն խլել է մոտ 400 մարդու կյանք:
Հիվանդությամբ վարակվածության դեպքեր են արդեն գրանցվել Արևմտյան Աֆրիկայի մի քանի երկրներում, ու ներկայում բժիշկները մտավախություն ունեն, որ վարակը կարող է տեղափոխվել այլ տարածաշրջաններ:
Այս շաբաթ ԱՀԿ-ը հրապարակել է աֆրիկյան մայրցամաքի արևմուտքում Էբոլա տենդի տարածման վիճակագրությունը: Ընդհանուր առմամբ գրանցվել է հիվանդացության 635 դեպք՝ Գվինեայում, Սյեռա-Լեոնեում ու Լիբերիայում: 399 մարդ արդեն մահացել է, ինչը ռեկորդային է՝ գրում է Newsweek-ը:
Արևմտյան Աֆրիկայում վարակը շատ ագրեսիվ է ու տարածվում է մեծ արագությամբ: Դա արդեն խուճապ է առաջացրել բնակչության շրջանում: Տարածաշրջանի բոլոր երկրները բժշկական խիստ հսկողություն են սահմանել օդանավակայաններում: