Պանիր սարքե՞նք

Առաջին տաս րոպեն ինքդ քեզնից գոհ` փայտե գդալով կաթն ես խառնում, ու հպարտ դեմքիդ մենակ մի բան կարելի է կարդալ «ես դեմք եմ»: Սա առաջին տաս րոպեն էր…մնացած 30-40 րոպեն անցնում են խորը զղջման մեջ` «պետք էր պանիրը սուպերմարկետից առնել` ընդամենը 2 րոպե ու վերջ»: Ահա այսպես անցավ իմ` պանիր պատրաստելու առաջին փորձը: Չեմ խաբի` շատ հոգնեցնող գործընթաց էր, բայց աննկարագրելի զգացողություն էր, երբ ընկերներդ փորձում են պատրաստածդ ու զարմացած դեմքով ասում` «իսկականից պանիր է ստացվել», ու այդ խոսքերի հետ մեկ կտոր էլ վերցնում ամանի մեջ: Հավատացեք՝ տվյալ դեպքում լավագույն կոմպլիմենտը ձեր պատրաստածի համար ոչ «համեղ» կամ «լավ» բնորոշումներն են, այլ «պանիր»-ը: Դե ինչ, եթե պատրաստ եք մի փոքր հոգնել այս զգացողությունը վայելելու ու ձեր խոհարարական հմտությունները նոր մակարդակի հասցնելու համար, ուրեմն անցնենք գործին:

Պանիր պատրաստելու համար շատ բան պետք չի`

4 լ կաթ (կստացվի մոտ 400 գր պանիր)

* եթե ուզում եք իսկական հագեցած համ, ուրեմն որևէ ծանոթ գյուղացուց գնեք թարմ կաթ (անպայման ծանոթ գյուղացուց, այլապես կարող եք գնել վատ որակի կաթ): Պաստերիզացված կաթով նույնպես կարող եք պանիր պատրաստել, բայց անպայման նայեք, որ յուղայնությունը բարձր լինի:

1 ½ թգ կիտրոնաթթու

1 ½ բաժակ եռացրած, սառեցրած ջուր

Ինչպես նաև պետք կգա` մեծ կաթսա, երկու թաս, մաքուր քաթանե կտոր, փլավքամիչ:

Պատրաստման եղանակը`

Դրեք մեծ կաթսան միջին կրակի վրա, լցրեք ջրի կեսը, հետո նոր կաթը: Ջրի մյուս կեսին ավելացրեք կիտրոնաթթուն ու լուծեք: Կաթը պետք է հասնի 98 աստիճանի, եթե չունեք ջերմաչափ, ապա ասեմ՝ կտևի մոտ 15 րոպե, մինչև հասնեք այդ ջերմաստիճանին: Հիմա խառնում ենք կաթի մեջ լուծված կիտրոնաթթուն ու աղ ավելացնում: Մեծ գդալով դանդաղ խառնում ենք լուծույթը` ներքևից վերև կամ ժամացույցի սլաքի ուղղությամբ: Այս խառնելու տեխնիկան շատ կարևոր է` առաջինի դեպքում ստանում եք մոցառելլա, մյուսի դեպքում ռիկոտտաա:

Չենք դադարում խառնել, մինչև չտեսնենք, որ լուծույթը բաժանվում է երկու գույնի` սպիտակ կաթնաշոռային զանգվածի և դեղնավուն ջրի: Հենց տեսնում եք սա նշանակում է, շուտով կրակն անջատելու ժամանակն է(եթե 30 րոպեից ավել եք խառնում): Շարունակեք խառնել, մինչև չստանաք որքան հնարավոր է շատ կաթնաշոռային զանգված: Հենց այս պրոցեսը դադարի` անջատեք կրակն ու թողեք լուծույթն ու զանգվածը մի փոքր հանգստանան:

15 րոպեն բավական է հանգստի համար: Զգույշորեն վերցրեք ու տեղափոխեք ողջ լուծույթը փլավքամիչի մեջ, քամեք հնարավորինս չափ ու տեղավորեք հարմար հերմետիկ ապակե ամանի մեջ:

Պահեք ռիկոտտան սառնարանում ողջ գիշեր ու առավոտան կարող եք վայելել այն նախաճաշին:

Ի դեպ, եթե ուզում եք ռիկոտտան դեսերտներում օգտագործել, ապա այն սառացնելու կարիգ չկա: Կարող եք կաթսայից քամել ռիկոտտան ու միանգամից ավելացնել չիզքեյքին կամ այլ աղանդերին:

Համոզված եմ, որ 45 րոպեյի հոգնածությունը կանցնի, հենց որ տեսնեք առավոտյան թե ինչ համեղ ու «պանիր» պանիր եք պատրաստել:

Սիրով`

Նյամիկ Էլլա Կանեգարիան