Դերասանուհի, հաղորդավարուհի Նարինե Սուլթանյանն այն կանանցից է, ովքեր կարողանում են հաջող կերպով համատեղել կարիերան ընտանիքի հետ: Միևնույն ժամանակ, նա չի դադարում հեռուստադիտողներին ներկայանալ նորովի՝ ընդգծելով իր ինքնատիպությունը: Life.panorama.am-ը Նարինե Սուլթանյանի հետ զրուցել է մասնագիտական հարցերից, նրա ընտանիքից ու առաջիկայի երազանքից:
-Դերասանուհու ձեր մասնագիտությունն ամենաշատը, թերևս, կիրառել եք հաղորդավարության ոլորտում, այո՞:
-Տվյալ պահին «Նանե»-ի ձևաչափով հաղորդումը մեծ դերասանական տվյալներ չի պահանջում: Հետևաբար, կարելի է ասել, ներկա պահին իմ դերասանական հմտությունները դրսևորում եմ ֆիլմերի կրկնօրինակման ժամանակ:
-Եթե բավականաչափ ժամանակ ունենայիք, կխաղայի՞ք թատրոնում:
-Այո, կխաղայի, բայց թատրոնն , իսկապես, շատ ժամանակ և նվիրում է պահանջում , իսկ ես չեմ կարող ինձ թույլ տալ զբաղվել ամեն ինչով միաժամանակ: Ինձ ծանրաբեռնում եմ այնքան, որ կարողանամ ժամանակ հատկացնել հարազատներիս: Գուցե գա պահ, երբ հեռուստատեսությունը փոխարինեմ թատրոնով կամ ֆիլմում նկարահանվելով:
- Ֆիլմում նկարահանվելու հարմար հրավեր ստացե՞լ եք: Ի՞նչ չափանիշներով կառաջնորդվեք` նման առաջարկներ ընդունելու հարցում:
-Միանշանակ համաձայնությունս տալուց առաջ առաջնահերթ կընթերցեմ սցենարը, կզրուցեմ ռեժիսորի հետ՝ հասկանալու համար՝ արդյո՞ք մեր գեղագիտական ճաշակը համընկնում է: Պետք է հետաքրքրված լինեմ կերպարով, որպեսզի կարողանամ աշխատել և այդ կերպարին տալ ուրույն դիմագիծ:
-Կա՞մի նոր հետաքրքիր համագործակցության առաջարկ, որի մասին կցանկանայիք պատմել:
-Առաջարկներ պարբերաբար լինում են, բայց նախապես չեմ ցանկանում խոսել դրանց մասին, այլ՝ ծրագրերն իրականացնելուց հետո միայն: