«Առավոտ». Յուվեցի Կարոյի փեսայի նման մարդիկ մանիակ մարդասպաններ չեն, մաֆյոզիներ չեն, նրանք պարզապես «լավ տղեք» են

Ներկայացնում ենք թերթի խմբագրականից մի հատված.

«Յուվեցի Կարոյի փեսայի նման մարդիկ մանիակ մարդասպաններ չեն, մաֆյոզիներ չեն, նրանք պարզապես «լավ տղեք» են՝ «թասիբի մեռած», և հանուն իրենց պաթոլոգիկ «սկզբունքների» պատրաստ են ոչ միայն մարդ սպանել, այլև ամբողջ մարդկությունը վերացնել։

Այդպիսի մի կերպար է նաև, օրինակ, Գյումրիի նախկին քաղաքապետ Վարդան Ղուկասյանի որդին՝ Սպարտակը, Սյունիքի նախկին մարզպետը՝ իր ընտանիքով հանդերձ, և այլն։ Նման միջավայրում զենք պահելն ու գործածելը ինքնահաստատման, իրենց «պապաների» և «աներ-պապաների» քրեական ավանդույթների պահպանման միջոց է։ 
Հիշենք, որ 2010 թվականի հոկտեմբերի 5-ին Յուվեցին, ռազբորկայի մեջ մտնելով ոմն Արթուր Զադոյանի հետ, 5 անգամ կրակել է նրա ուղղությամբ, բայց, բնականաբար, խուսափել է պատասխանատվությունից։

Քաղաքական թեման փակելու համար ասեմ, որ Յուվեցուն որպես ԲՀԿ-ական չեմ ընկալում։ Որպես օրենսդիր՝ նույնպես։ Ճիշտ այնպես, ինչպես Կարամելին և Շերիֆին՝ նույն խմբակցությունից, Շմայսին, Թոխմախին կամ Բուռնաշին՝ ՀՀԿ-ից։ Եվ այդպես՝ շատ-շատերին։ Իրենց համար բացարձակապես միևնույն է, թե ինչ «քվոտա»-ով են խցկվել Աժ՝ իրենց գործերը «դզելու» համար։ Ցավալին այն է, որ իրենց պաթոլոգիաները նրանք փոխանցում են հաջորդ սերունդներին։

Ինչ վերաբերում է Վերնիսաժի կրակոցներին, ապա վստահ եղեք՝ գործը կոծկելու են։ Ինչպես Լիսկայի տան մոտ կրակոցների գործը։ Ձևակերպելու են որպես Յուվեցու փեսայի ինքնապաշտպանություն»,–գրում է թերթի խմբագիրը։

Ամբողջությամբ՝ թերթի այսօրվա համարում։