Մեր «թթու» սերը ..

Ես լիմոնով թեյ շատ էի սիրում, իսկ դու սիրում էիր ուտել իմ թեյի միջի լիմոնները .. ես բարկանում էի վրադ, իսկ դու վերցնում էիր իմ ամենասիրած վերնաշապիկդ ու սպառնում, որ կկտրատես, ես քեզնից գողանում էի մկրատը ու լեզու հանում, դու ծիծաղում էիր ինչքան ուժ ունեիր.. 
Երեկոները մենք երկուսից երեք ժամ վիճում էինք, թե որ ֆիլմն ենք դիտելու, հետո ես ուժասպառ պարկում էի հատակին, իսկ դու ինձ համար լիմոնով թեյ էիր պատրաստում .. ես խմում էի թեյը, իսկ դու` ուտում լիմոնները .. 
Շատ հաճախ մենք վիճում էինք, թե որ երգը դնենք որպես զարթուցիչ, ու շատ հաճախ դու դիտավորյալ թույլ էիր տալիս, որ ես հաղթեմ ...
Առավոտյան դու միշտ առաջինն էիր արթնանում, ու սուրճ պատրաստում մեզ համար .. ես շատ հաճախ զայրանում էի, թե ինչո՞ւ է սուրճս թթու, դու ուժասպառ լինելու աստիճան ծիծաղում էիր ու սուրճս փորձելու պատրվաքով, թե արդյո՞ք թթու է,խմում էիր ամբողջը ...
Ես նախաճաշ էի պատրաստում, իսկ դու կողքիս կանգնած նայում էիր իմ դողացող մատներին ու քմծիծաղ տալիս ..
Դու երջանկանում էիր, երբ տեսնում էիր, թե ինչպես եմ ջանում, որ նախաճաշդ համեղ ստացվի: Ես երբեք չէի մտածում, որ իմ պատրաստած հում ձվածեղները ամենահամեղը կարող էին լինել քեզ համար ..
Ես լվանում էի ամանները, իսկ դու շտապում էիր աշխատանքի.. 

Դու հաճախ ինձ վարդեր էիր նվիրում, իսկ ես երբեք չէի ասում, որ երիցուկներ եմ սիրում .. 
Դու համբուրում էիր ճակատս, իսկ ես փակում էի աչքերս ու երջանկություն ապրում.. 

Ես սիրում էի, երբ բարկանում էիր ինձ վրա, սիրում էի, երբ աչքերդ փոքրանում էին բարկությունից ու սկսում էիր դեմքդ խոժոռել . ես սիրում էի քեզ այդպես ջղային ու այդքան գեղեցիկ .. 
Դու բարկանում էիր, իսկ ես ծիծաղում էի ու թավալ գալիս հատակին, դու սպառնում էիր դուրս շպրտել իմ ամենասիրած զգեստները, ես շրթունքներս կախում էի, աչքերս լցնում, դու գրկում էիր գլուխս ու ես թաքուն ժպտում էի ... Հետո մենք ժամեր շարունակ նստում էինք իրար կողքի ու ծպտուն չէինք հանում .. Դու փակում էիր աչքերդ, ես գրկում էի գլուխդ ու դնում ծնկներիս, դու երջանկություն էիր ապրում, իսկ ես սիրում էի քեզ այդքան երջանկացած ..
Շատ հաճախ դու քնում էիր հենց հատակին, գլուխդ ծնկներիս, իսկ ես ամբողջ գիշեր երջանկությունից չէի քնում .. 
Ես սիրում էի, երբ քո կոշտացած ձեռքերը շոյում էին իմ բարակ մատները .. հետո ես դրանք խրում էի մազերիդ մեջ, իսկ դու խուտուտ էիր տալիս, որ դադարեմ ու սանրվածքդ չփչացնեմ .. ես ժպտում էի, քաշում այտերիցդ ու համբուրում ճակատդ .. Դու մի ձեռքով գրկում էիր փոքրիկ մարմինս, ու ես ինձ պաշտպանված էի զգում.. 
Դու ասում էիր, որ ես աշխարհի ամենագեղեցիկ աղջիկն եմ, չնայած երկուսս էլ գիտեինք, որ դա այդպես չէր .. ես ժպտում էի, ու շնորհակալության փոխարեն համբուրում այտերդ, ու ես քեզ համար իրոք դառնում էի աշխարհի ամենագեղեցիկը ..
Դու շատ հաճախ ինձ համար լիմոնով թեյ էիր պատրաստում, մինչ ես արդուկում էի վերնաշապիկդ ..
Ես չափից դուրս շատ էի սիրում քո պատրաստած սառը ու անհամ թեյերը, ինչպես դու իմ ՝անհամ ձվածեղները..

Ես սիրում էի մեզ..
Իսկ դու շատ հաճախ կրկնում էիր, որ մենք անբաժան ենք լինելու ..

Երբ ամառ եկավ, ու ես այլևս թեյ չէի խմում, իսկ դու չէիր ուտում իմ թեյի միջի լիմոնները .. մենք բաժանվեցինք.