Բելառուսը հրաժարվել է արգելափակել Եվրասիական տնտեսական միության ստեղծումը

1in.am-ը գրում է.

Բելառուսը չի արգելափակի Եվրասիական տնտեսական միության ստեղծման մասին պայմանագրի ստորագրումը: Այս մասին, ինչպես հաղորդում է RIA Novosti-ն, հայտարարել է այսօր Բելառուսի նախագահ Ալեքսանդր Լուկաշենկոն:

«Մենք չենք արգելափակի Եվրասիաական տնտեսական միության ստեղծման պայմանագրի ստորագրումը: Եթե մենք չենք կարող անել մեծ քայլ, մենք կշարժվենք փոքր քայլերով»,- հայտարարել է Լուկաշենկոն՝ Մինսկում պատասխանելով լրագրողների հարցերին:

Նա ընդգծել է, որ Ռուսաստանի նախագահ Վլադիմիր Պուտինի հետ բանակցությունների ընթացքում Մինսկին անհանգստացնող հարցերը Պուտինը կարողացել է ցրել:

«Սակայն դրա հետ մեկտեղ հարկ է հասկանալ, որ մենք անտեղ չենք գնացել մեկնած ձեռքով ու ինչ-որ բան խնդրել, դա եղել է փոխզիջում»,- ընդգծել է Լուկաշենկոն:

Նրա խոսքով՝ Բելառուսն ու Ռուսաստանը պայմանավորվել են նվազեցնել Մինսկի համար նավթամթերքի մաքսատուրքը: «Մենք պայմանավորվել ենք, որ աստիճաբար նվազեցնելու ենք մաքատուրքերը: Մյուս տարի մոտավորապես կեսը կմնա բելառուսական բյուջեին: Ես ենթադրում եմ, որ դա կլինի մոտավորապես 1,5 մլրդ դոլար»,- ասել է Լուկաշենկոն:

Նրա խոսքով՝ 2016-ին կողմերը կվերադառնան այդ հարցին: Լուկաշենկոն վստահություն է հայտնել, որ 2 տարվա ընթացքում մաքսատուրքերի հետ կապված հարցը կլուծվի:

Բացի դրանից՝ ըստ Լուկաշենկոյի, Բելառուսը մայիսին Ռուսաստանից 2 մլրդ դոլար վարկ կստանա:

Ռուսաստանի, Բելառուսի և Ղազախստանի միջև Եվրասիական տնտեսական համագործակցության ստեղծման եռակողմ պայմանագիրը նախատեսվում է ստորագրել մայիսի 29-ին Աստանայի գագաթնաժողովում: Ավելի վաղ Լուկաշենկոն սպառնում էր արգելափակել փաստաթուղթը՝ կապված Ռուսաստանից մատակարարվող նավթամթերքի մաքսատուրքերի հետ: