Սիրիայում հակամարտող կողմերը պետք է պաշտպանեն բոլոր խաղաղ բնակիչներին. Պան Գի Մուն

1in.am-ը գրում է.

Սիրիայում հոլանդացի հոգևորականի սպանությունից ու խաղաղ բնակիչների վրա գրոհայինների մի շարք հարձակումներից հետո ՄԱԿ-ի գլխավոր քարտուղար Պան Գի Մունը պահանջել է, որպեսզի հակամարտող կողմերն ապահովեն բոլոր խաղաղ բնակիչների անվտանգությունը՝ անկախ նրանց կրոնական և էթնիկ պատկանելությունից: Այս մասին հայտնում է ITAR-TASS-ը՝ հղում անելով կազմակերպության մամլո հաղորդագրությանը:

72-ամյա ճիզվիտ հոգևորական Ֆրանս վան դեր Լուգտի սպանությունը տեղի էր ունեցել Հոմսում: 

«Գլխավոր քարտուղարը դատապարտել է բռնության այդ անմարդկային գործողությունը մի մարդու դեմ, ով հերոսաբար կանգնել է Սիրիայի ժողովրդի կողքին՝ չնայած շրջափակմանն ու աճող դժվարություններին»,- ասվում է հաղորդագրությունում:

Նշվում է, որ Պան Գի Մունը ցնցված է Քեսաբում կոտորածի մասին նյութերով, չնայած ՄԱԿ-ում դրանց իսկության հաստատում չկա: