Դերասանուհի, երգչուհի Իվետա Եդիգարյանն արդեն շուրջ մեկ տարի է՝ բնակվում է ԱՄՆ-ում, և, կարծես, իր հետագա պլաններն արդեն կապում է այնտեղի հետ: Life.panorama.am-ը երգչուհուց հետաքրքրվեց, թե ինչով է նա այժմ զբաղված Նահանգներում, արդյոք վերադառնալու միտք ունի և որ դեպքում երկրպագուները կարող են սպասել նրան հայրենիքում:
-Այս պահին ԱՄՆ-ում ինչո՞վ եք զբաղված:
-Ճիշտն ասած, վեց ամսով եկել էի ծնողներիս մոտ, բայց այնպես ստացվեց, որ աշխատանք առաջարկեցին ու մնացի այստեղ: Երկու հայ տղայի հետ երգում եմ այստեղի ռեստորաններից մեկում: Համենայնդեպս, ունեմ աշխատանքային վիզա և ցանկացած պահի կարող եմ հայրենիք գալ:
- Ձեր և Վարդան Սարգսյանի «Երկու ճամփորդություն» համատեղ նախագծի երկրորդեթերաշրջանի թողարկման ծրագիրն ի՞նչ փուլում է:
-Ցավոք, նախագծի իրականացման աշխատանքները կիսատ են մնացել: Շատ բան կախված է հովանավորներից, բայց հնարավոր է, որ այն ունենա շարունակություն, քանի որ պահանջարկ ունի: Այստեղ նույնպես մարդիկ հետևում են մեր հաղորդմանը և սպասում նոր թողարկումների:
- Ինքներդ ձեզ ավելի շատ դերասանուհի եք համարում, թե՞ երգչուհի:
-Ես ինձ համարում եմ պրոֆեսիոնալ դերասանուհի, ով նաև երգում է, արժանանում հանդիսատեսի գնահատանքին: Երգում եմ այն, ինչ հոգեհարազատ է ինձ ու լավ է ստացվում:
-Դուք ԱՄՆ -ում հանդես եք գալիս համերգներով, իսկ այստեղ, կարծես, այդքան էլ ակտիվչեք. կարելի՞ է ասել, որ ձեր երգերը հենց այդտեղի համար է:
-Ես այդպես չէի ասի. Հայաստանում նույնպես ունեցել ենք շատ համերգներ՝ Երևանում ու մարզերում: Իսկ ԱՄՆ-ում երգում եմ ռեստորանում, ընդ որում, ոչ միայն իմ հեղինակային երգերը, այլև այն, ինչի պահանջարկը կա: