Հայաստանի և Ադրբեջանի արտգործնախարարներն ապրիլին կհանդիպեն Մոսկվայում

1in.am-ը գրում է.

Հայաստանի արտգործնախարար Էդվարդ Նալբանդյանն ու Ադրբեջանի արտգործնախարար Էլմար Մամեդյարովն ապրիլին Մոսկվայում հանդիպում կանցկացնեն՝ մոտ ապագայում երկու երկրների նախագահների հանդիպում նախապատրաստելու համար: Այս մասին ասվում է ԵԱՀԿ կայքում հրապարակված հայտարարության մեջ: 

ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ժակ Ֆորը (Ֆրանսիա) և Ջեյմս Ուորլիքը (ԱՄՆ) հանդիպումներ են անցկացրել Հայաստանի նախագահ Սերժ Սարգսյանի և Ադրբեջանի նախագահ Իլհամ Ալիևի հետ մարտի 23-24-ին՝ Հաագայում: ԵԱՀԿ գործող նախագահի անձնական ներկայացուցիչ Անջեյ Կասպրշիկը նույնպես մասնակցել է հանդիպումներին՝ ասվում է հաղորդագրությունում:

ԵԱՀԿ Մինսկի խմբի համանախագահները նախագահներին տեղեկացրել են արտգործնախարարների հետ կատարված աշխատանքների մասին այն հարցերի շուրջ, որոնք բարձրացվել էին նոյեմբերին բարձր մակարդակով հանդիպման ընթացքում: 

Համանախագահներն ընդգծել են սահմանին և շփման գծում բռնությունից խուսափելու անհրաժեշտությունը և կողմերին կոչ արել զերծ մնալ ագրեսիվ հռետորությունից, որը կարող է մեծացնել լարվածությունը տարածաշրջանում: