Տուրչինովը ստորագրել է Ազգային գվարդիա ստեղծելու մասին օրենքը

1in.am-ը գրում է.

Ուկրաինայի նախագահի պաշտոնակատար Ալեքսանդր Տուրչինովը ստորագրել է Ազգային գվարդիա ստեղծելու մասին օրենքը: 

Փաստաթուղթը կարգավորում է նոր ռազմական միավորման գործունեությունը, որը ստեղծվել է Ներքին զորքերի հիման վրա: «Ուկրաինայի ազգային գվարդիայի մասին» № 876-VII օրենքի ստորագրման մասին ասվում է Ռադայի պաշտոնական կայքում: 

Հիշեցնենք, որ մարտի 13-ին օրենքին իր աջակցությունն էր հայտնել 262 պատգամավոր:

Ուկրաինայում պաշտոնապես Ազգային գվարդիա գոյություն ունեցել է 1990-ականների սկզբներից մինչև 2000 թվականը: Սկզբում այն ենթարկվում էր Գերագույն ռադային, այնուհետև՝ նախագահին: Ազգային գվարդիայի հանձնարարությունների մեջ էին մտնում սահմանադրական կարգի պաշտպանությունը, արտակարգ իրավիճակների հետևանքների վերացմանը մասնակցելը, սահմանապահներին օգնություն ցուցաբերելը, դրսից հարձակումների հետմղման մարտական գործողություններին մասնակցելն ու Ուկրաինայի անվտանգությունը պաշտպանելը: 2000 թվականին գվարդիան լուծարվեց: Անձնակազմն ու սպառազինությունը հանձնվեցին Զինված ուժերին և ՆԳՆ ներքին զորքերին:

Ժամանակին Ազգային գվարդիան վերստեղծելու անհաջող փորձ է արել Յուրի Լուցենկոն՝ ներքին գործերի նախարարի պաշտոնը զբաղեցնելու ժամանակ: