Ամենագունավոր կղզու լեգենդը

Բուռանո կղզին գտնվում է Վենետիկին շատ մոտ: Այս կղզի կարելի է հասնել նավակով ընդամենը 40 րոպեում: Կղզին հիմնել են հռոմեացիները՝ բարբարոսների արշավանքներից զերծ մնալու համար: Առաջին տներն այստեղ կառուցվել են եղեգից, որոնք ամրացվել են կավով: Տարիներ անց տեղի բնակիչները դրանք փոխարինել են աղյուսով և ներկել տարբեր գույներով: Համաձայն այս կղզում տարածված լեգենդի՝ երբ ծովայինները վերադարձել են կղզի, չեն կարողացել մշուշի մեջ տարբերակել իրենց տունը: Եվ հենց այս պատճառով էլ կղզու բնակիչները որոշել են տները ներկել տարբեր գույներով:

Այսօր Բուռանո կղզում որոշ կանոններ են գործում՝ կապված տների արտաքին գունավորման հետ: Եթե բնակիչը ցանկանում է ներկել իր տան արտաքին հատվածը, նա պարտավոր է դիմում գրել տեղական ինքնակառավարման մարինին՝ թույլտվություն ստանալու համար: Տեղական ինքնակառավարման մարմինը ինքն է որոշում, թե ինչ գույն պետք է լինի տվյալ շինությունը:

Թեև կղզին բնակեցվել է 6-րդ դարից, այն հայտնի է դարձել միայն 16-րդ դարում, երբ տեղի բնակիչները սկսեցին սզբաղվել ասեղնագործությամբ: Մինչև 18-րդ դարը կղզուց ողջ Եվրոպա էին արտահանում այդ ասեղնագործ գործվացքներ, սակայն շուտով առևտուրը կանգ առավ: 1872 թվականին այստեղ հիմնադրվում է ասեղնագործության դպրոց, սակայն այն հաջողություններ չի գրանցում: Այսօր կղզում գրեթե ոչ ոք չի զբաղվում ասեղնագործությամբ, քանի որ բարդ և ոչ շահավետ զբաղմունք է: