Խստորեն դատապարտում եմ ռուսաստանյան ագրեսիան Ուկրաինայի նկատմամբ

Որպես հայ մարդ ու մտավորական, որպես մեկը, ում ծննդավայրը Ռուսաստանի Դաշնությունն է, խստորեն դատապարտում եմ ռուսաստանյան ագրեսիան Ուկրաինայի նկատմամբ, Ուկրաինայի տարածքային ամբողջականությանն ուղղված Ռուսաստանի անօրինական քայլերը համարում եմ ՄԱԿ-ի և ԵԱՀԿ-ի բազմաթիվ բանաձևերի կոպիտ խախտումներ:
Մի պետության կողմից կողմից մեկ այլ պետության ներքին խնդիրներին միջամտելը համարում եմ անընդունելի, իսկ ռազմական գործողությունների իրականացումը դիտարկում եմ մարդկության դեմ գործվող ծանր հանցագործություն, քանզի ցանկացած ռազմական գործողություն ծնում է ծանր հետևանքներ, մեծացնում անմեղ զոհերի թիվը...
Ռուսաստանն իրավունք չունի մարդկանց զրկելու ապրելու իրավունքից, վնասելու Ուկրաինայի խաղաղությանը:
Չեմ կարող անտարբեր մնալ Ղրիմում ապրող մի քանի տասնյակ հազար իմ հայրենակիցների ճակատագրերին: Ղրիմը դարեր շարունակ նաև բազմաթիվ հայերի հայրենիքն է, ուստի այսօր Ռուսաստանը սպառնում, է նաև մեր հայրենակիցների կյանքին ու ապահովությանը:
Մեկ անգամ ևս բողոքի ձայն բարձրացնելով ռուսաստանյան ագրեսիայի դեմ, կոչ եմ անում Հայաստանի իշխանություններին, Ազգային ժողովին, բոլոր քաղաքական ուժերին՝ վերաբերմունք արտահայտել Ուկրաինայում տեղի ունեցող իրադարձություններին, հանդես գալ ի պաշտպանություն Ղրիմի հայկական համայնքի, միաժամանակ զգուշացնել Ռուսաստանին, որ ցանկացած ռազմական գործողություն Ուկրաինայում կարող է իր անդրադարձներն ունենալ Հարավային Կովկասում՝ այսպես սկիզբ դնելով նոր տարածաշրջանային պատերազմի...