Life.panorama.am-ը գրում է.
Վիգեն Մնոյանն արդեն 18 տարի է` զբաղվում է լուսանկարչությամբ, լուսանկարում է ֆեշն, նյու ոճերում, կատարում է նաև բնապատկերներ: Նա այն լուսանկարիչներից է, որի ֆոտոխցիկն ամենալավն է ճանաչում հայ աստղերին: Life.panorama.am-ն փորձել է պարզել` այս տարիների ընթացքում ինչ է ֆիքսել եւ ինչ է թաքցրել այդ ֆոտոխցիկը, որոնք են լուսանկարչի աշխատանքի նրբությունները:
-Արդեն երկար տարիներ է `աշխատում եք հայ աստղերի հետ, նրանց հետ մինչ այժմ արած ֆոտոսեսիաներից որո՞նք են ամենահաջողվածները:
- Շատ ֆոտոսեսիաներ կան, որոնք կառանձնացնեի, բայց ընդգծված կերպարներ ստացել եմ դերասանուհի Նազենի Հովհաննիսյանի եւ Լոռվա գեղատեսիլ բնության գրկում ոճաբան Արմեն Երիցյանի հետ արված ֆոտոսեսիաներում:
-Աստղերի հետ ֆոտոսեսիաներին ինչպե՞ս եք պատրաստվում. ի՞նչ նախնական աշխատանքներ են տարվում:
-Նախ` հստակեցնում ենք` ինչ պետք է ստանանք և որ ավելի կարևոր է` ինչ նպատակով: Դրա հիման վրա փորձում ենք կերպար ստանալ:
- Հայ մոդելների առանձնահատկությունը ո՞րն է:
- Չեմ նկատել նման բան: Հայի, ռուսի կամ այլ ազգի մեջ չէ տարբերությունը, այլ կոնկրետ անձանց:
- Հայ մոդելները մերկ լուսանկարվելու արվեստին տիրապետու՞մ են:
-Իմ միակ պահանջը մոդելից այն է, որ անմարդկային ու կեղծ չլինի. մնացածն արդեն իմ գործն է (ծիծաղում է):
- Հայաստանում լուսանկարիչները լա՞վ են վաստակում: Մասնավոր պատվերներ կատարո՞ւմ եք (հարսանիք, ծնունդ...):
- Հայաստանում լուսանկարչությամբ կարելի է գումար վաստակել, եթե դու լավ մասնագետ ես` պրոֆեսիոնալ: Մասնավոր պատվերներ լինում են ավելի շատ ֆոտոսեսիաների տեսքով, բայց եթե լինում են նաև հարսանեկան կամ այլ հետաքրքիր առաջարկներ, չեմ հրաժարվում:
- Դուք լուսանկարում եք նյու ոճում. կպատմե՞ք վերջին աշխատանքների մասին:
-Բազմաթիվ ծրագրեր ունեմ թե´ սոցիալական ուղղվածության լուսանկարչության ասպարեզում, որը պարտադիր է իմ վերջին 10-12 տարվա աշխատանքի շրջանակներում, թե´ ավելի գլամուրային, բայց չեմ սիրում խոսել չարածի մասին. ժամանակը կգա և կպատմեմ արդեն իրագործվող նախագծերից:
- Ի՞նչ պետք է անել, որ ֆոտոխցիկը «սիրի» մեզ:
- Պետք է լինել անկեղծ ու ազատ. տեսախցիկը կեղծիք չի սիրում:
- Շատ եք լուսանկարում նաեւ երեխաներին, այս դեպքում առանձնահատկությունը ո՞րնէ:
-Պետք է սիրես երեխային: Չնայած այն հանգամանքին, որ դժվար է լեզու գտնել նրանց հետ, ես երեխաների հետ աշխատել շատ եմ սիրում: Նրանք էլ ինձ են սիրում. արդյունքում ունենում ենք ստացված լուսանկարներ:
- Ձեր սիրելիին հաճա՞խ եք նկարում, դա հեշտ է, թե՞ դժվար:
- Չէ, սիրելիիս հաճախ չեմ լուսանկարում. դա դժվար է, ուղղակի հաճախ հիանում եմ նրանով (ժպտում է):
Հեղինակ Աննա Բաբաջանյան