Պեկինում ուժեղ սմոգի պատճառով հայտարարվել է վտանգավորության «դեղին» մակարդակ

1in.am-ը գրում է.

Չինաստանի մայրաքաղաք Պեկինում ուժեղ սմոգի պատճառով հայտարարվել է վտանգավորության «դեղին» մակարդակ՝ հայտնում է ITAR-TASS-ը: Ինչպես հայտարարել են տեղի ԶԼՄ-ները, ճանապարհապարեկային ծառայության աշխատակիցներին հանձնարարված է աշխատել պաշտպանիչ դիմակներով, շինարարական օբյեկտներում կասեցվել են աշխատանքները: 

Ներկայում մթնոլորտային աղտոտվածության ինդեքսը գերազանցում է 400 միավորը, ինչի հետևանքով քաղաքի մի շարք շրջաններում տեսանելիությունը չի գերազանցում 100 մետրը: 

Երեխաներին, տարեցներին ու շնչառական հիվանդություններով տառապող մարդկանց խորհուրդ է տրվում զերծ մնալ փողոցում երկար ժամանակով մնալուց: 

Չինաստանում ընդունված է տարերային աղետների նախազգուշացման 4 մակարդակ՝ կապույտ, դեղին, նարնջագույն ու կարմիր: