Ուկրաինայում վիճակը կուլմինացիոն է. «Ինտերնյուս-Ուկրաինա»

1in.am-ը գրում է.

Այն իշխանությունները, որոնք կրակում են իրենց ժողովրդի վրա, չեն կարող լեգիտիմ լինել: Ուկրաինայում առկա իրավիճակի մասին այսօր կազմակերպված քննարկման ժամանակ նման տեսակետ հայտնեց Գլոբալիզացիայի և տարածաշրջանային համագործակցության վերլուծական կենտրոնի ղեկավար, քաղաքագետ Ստեփան Գրիգորյանը: 

«Ուկրաինական դեպքերում ես արտաքին հետք եմ կասկածում: Այլապես Յանուկովիչը կուզե՞ր, որ ամբողջ աշխարհը երես թեքեր իրենից: Միաժամանակ, ուկրաինացի ժողովրդի պայքարն արդար է: Սա պայքար է կրիմինալ վարչակարգի դեմ: Ինչ վերաբերում է ԱՄՆ-ին և Եվրոպային, ապա նրանք անթույլատրելի չեզոքություն են պահպանում»,- ասաց քաղաքագետը:

Ստեփան Գրիգորյանի խոսքով՝ Ուկրաինայում վիճակն իրոք ծանր է, և ակնհայտ է, որ այդ երկրի նախագահ Վիկտոր Յանուկովիչը զիջումների գնալ չի պատրաստվում: 

«Կրիմինալ ուժերը քաղաքական քայլերով առաջ չեն շարժվելու: Եվրոպա գնալ ցանկացող ժողովրդին ուզում են տանել դեպի կրիմինալ: Իսկ Ուկրաինայի ժողովուրդը սովոր է ազատության, ինչը շատ անգամ չի համընկնում իշխանությունների կարծիքի հետ: Այս երկրին անհնար է մտցնել, ասենք, Բելառուսի տոտալիտար ռեժիմի պես ռեժիմի մեջ: Կասկած չունեմ, որ ուկրաինացի ժողովրդին հնարավոր չի լինի անազատություն պարտադրել»,- ասաց քաղաքագետը՝ հավելելով, որ Ուկրաինայում հաստատված վիճակը կարող են փրկել ԱՄՆ-Եվրոպա համատեղ պատժամիջոցները:

Ստեփան Գրիգորյանը նկատեց, որ Հայաստանի դեպքում, ի տարբերություն Ուկրաինայի, առկա է անորոշ իրավիճակ: «Ուկրաինական սցենարը մեր երկրում քիչ հավանական է: Պետք չէ Հայաստանը խառնել Ուկրաինայի հետ, քանի որ վերջինս հենց Եվրոպան է, որ կա: Մենք այլ օրակարգ ունենք, և երևի այդ է պատճառը, որ ընդդիմություն-իշխանություն հարաբերություններն այդքան էլ լարված չեն: Մեր իշխանությունները գոնե չեն կրակում բողոքողների դեմ, իսկ ահա Ուկրաինայում կրակում են»,- ասաց նա:

Քննարկմանը տեսակամուրջով միացած՝ «Ինտերնյուս-Ուկրաինայի» ներկայացուցիչ Անատոլի Մարցինովսկին իր հերթին նշեց, որ Ուկրաինայում վիճակը կուլմինացիոն է: «Ինչ վերաբերում է երկրում առկա իրավիճակի վերաբերյալ ԱՄՆ-ի և Եվրոպայի վերաբերմունքին, ապա կասեմ, որ նրանք պետք է իշխանությունների դեմ անհրաժեշտ պատժամիջոցներ կիրառեն: Մանավանդ Եվրոպան, որ ավելի մոտ է մեզ»,- ասաց նա:

Ուկրաինացի փորձագետ Ալեքսանդրա Մատրիչուկն էլ ասաց, որ իրավիճակն Ուկրաինայում իսկապես ծանր է: «Մայդանում համակարգված պայքար է ընթանում, կան առաջնորդներ: Մայդանը տարբեր կազմակերպությունների և ուժերի համախմբման վայր է, և տպավորությունը, թե այնտեղ պայքարը տարերային է, սխալ է»,- ասաց նա: