Հետազոտող. Մաշտոցը նախաաստվածային այբուբենն է վերականգնել
13:12 , 13 փետրվար, 2014Panorama.am-ը գրում է.
Անհատ հետազոտող Արծվի Ալեքսանյանը հայոց այբուբենի մեջ գաղտնիքներ է հայտնաբերել: Մասնագիտությամբ ֆիզիկ, գեոֆիզիկ հետազոտողը թաքնագիտական բացահայտումներ է արել և հայերեն տառերի ու բնագիտական առարկաների միջև կապ է տեսել: Այսօր լրագրողների հետ հանդիպմանը նա տեղեկացրեց, որ իր ուսումնասիրությունն արել է 40 տարվա ընթացքում, այդ մասին բարձրաձայնում է հիմա, երբ ավարտին է հասցրել հիմնական ուսումնասիրությունը:
Ըստ նրա, սա դեռ սկիզբն է. ամեն ոլորտի մասնագետի հետ պետք է սկսվեն ուսումնասիրությունները: «Մեկ տարի ուսումնասիրությունից հետո համաշխարհային գիտության մեջ նորություններ կհայտնաբերվեն: Մի երկրաբանը կարող է գտնել ոսկու հանք, բայց մենակ ի վիճակի չէ շահագործել: Այբուբենը գիտելիքների շտեմարան է, ավելի հարուստ, քան ոսկու հանքը: Այն միայն գիտական արժեք չի ներկայացնում»:
Ըստ հետազոտողի, հայոց այբուբենը համակարգ է, այն կարևոր ինֆորմացիա է պարունակում, եթե մի տառ ավելանա կամ պակասի, սիստեմը չի գործի: Հետազոտողը կարծում է, որ այբուբեն հնարել-գրելը, երբ լեզուն արդեն կա, այնքան էլ բարդ բան չէր:
«Այբուբեն ստեղծելու համար պետք էր նստել, տեսնել քանի հնչյուն ունի լեզուն, ամեն մեկին նշան հնարել: Բայց Մաշտոցի գործն ավելի մեծ էր, նախաաստվածային այբուբենն է վերականգնել նա»,- ասաց Արծվի Ալեքսանյանը:
Լեզուն և այբուբենը ստեղծվել են անհիշելի ժամանակներում, որպեսզի լիներ հաղորդակցության միջոց, նկատում է Ալեքսանյանը: Նա ենթադրում է, որ 301 թվականին՝ Հայաստան Քրիստոնեության մուտքի ժամանակ, մինչ այդ եղած ինֆորմացիոն կապը կտրվել է: «Ենթադրում եմ, որ Մաշտոցին հասել են պատառիկներ նախաքրիստոնեական շրջանից: Նա չէր կարող ասել, որ սա նախաքրիստոնեական շրջանի կոդեր են»:
Ամբողջական հոդվածը կարող եք կարդալ այստեղ