Ժնևում մեկնարկում է միջսիրիական բանակցությունների երկրորդ փուլը

Lurer.com-ը գրում է.

Ժնևում փետրվարի 10-ին մեկնարկում է միջսիրիական բանակցությունների երկրորդ փուլը ՄԱԿ-ի և ԱԵԼ-ի համատեղ բանագնաց Ախդար Իբրահիմիի միջնորդությամբ: Այս մասին հայտնում է սիրիական ՍԱՆԱ գործակալությունը:

Սիրիայի Արաբական Հանրապետության պատվիրակությունն Արտաքին գործերի նախարար Ուալիդ ալ Մուալլեմի գլխավորությամբ փետրվարի 9-ի կեսօրին հասել է Ժնևի օդանավակայան: Արաբական մեկ այլ աղբյուր նշում է, որ Սիրիայի ընդդիմադիր պատվիրակության կազմը գրեթե չի փոխվել:

Ավելի վաղ Սիրիայի պատվիրակության անդամ Ֆեյսալ ալ Միկդադը հայտարարել էր, որ Սիրիայի կառավարական պատվիրակությունը որոշել է մասնակցել միջսիրիական բանակցությունների երկրորդ փուլին:

Բանակցությունների անցկացմանը կրկին կօգնեն ՌԴ և ԱՄՆ փորձագետները:

Ավելի վաղ ՄԱԿ-ի և ԱԵԼ-ի բանագնացը հույս էր հայտնել, որ բանակցությունների երկրորդ փուլը կլինի կառուցողական: