Սեուլն ու Փհենյանը համաձայնության են եկել ընտանիքների վերամիավորման շուրջ

Lragir.am-ը գրում է.

Հարավային և Հյուսիսային Կորեաները համաձայնության են եկել` թույլ տալու 1950-53 թվականների Կորեական պատերազմի հետևանքով բաժանված մի շարք ընտանիքների անդամներին հանդիպել միմյանց, տեղեկացնում է Ռոյթերզը:

Ընտանիքների վերամիավորումը տեղի է ունենալու փետրվարի 20-ից 25-ը Կումգան լեռան վրա՝ երկու երկրների սահմանագծին: Նախորդ վերամիավորումների ժամանակ մոտ 100 ընտանիքների թույլ է տրվել հանդիպել իրար:

Մոտ 70 հազար հարավկորեացիներ ցանկություն են հայտնել հանդիպել սահմանից այն կողմ բնակվող իրենց կորած հարազատներին: Հաջողակներն ընտրվում են վիճակահանության միջոցով: