Եթե պատրաստ չեք ուղիղ խոսքի՝ մի շարունակեք կարդալ:
Մարդիկ հիմնականում այդ օրենքից ինչո՞ւ են բողոքում: Տոկո՞սն է վատը, չե՞ն հավատում, որ գումարները կպահպանվեն, չե՞ն հավատում կառավարությանը:
Իսկ մինչ այդ հավատո՞ւմ էին: Ոնց որ թե, այո: Խելոք օր-օրի աճող հարկերը սուսուփուս վճարում էիք: Տարիներ շարունակ:
Իսկ մի՞գուցե հենց Ձեր անձնական ապագան չեք ցանկանում կապել Հայաստանի հետ: Չեք ուզում երկարաժամկետ ներդրում անել և կապվել նրա հետ: Միգուցե վախենո՞ւմ եք, որ վաղը կորցնելու բան կունենաք արտագաղթելուց առաջ:
Լինենք ազնիվ:
Մարդիկ, որ լռում էին և ոչ մի արձագանք չունեին գոնե այս երեք տարիներին կատարվող իրադարձություններին, մեկ էլ ակտիվացան:
Այսքան մարդ ես սպասում էի Մաշտոցի պուրակում, երբ քաղաքապետը ավերում էր այն բուծիկներով:
Այսքան մարդ ես սպասում էի սպանված սպա Վահե Ավետյանի թաղման օրը և նեմեցի տան առաջ:
Այսքան մարդ ես սպասում էի ձմռանը 30 օր հացադուլ անող մարդու կողքը:
Այդքան մարդ ես սպասում էի ԱԺ-ի, նախագահի, ավագանու ընտրությունների օրերին տեղամասերի առաջ, ուր միայնակ էին խուժանի դիմաց:
Այդքան մարդ ես սպասում էի գազային պայմանագրի վավերացման օրը, երբ վաճառվեց Հայաստանը:
Այդքան մարդ ես սպասում էի սեպտեմբերի 4-ին, երբ դավաճանվեց Հայաստանի անկախությունը:
Այդքան մարդ ես սպասում էի քաղաքապետարանի առաջ, երբ տղաներին ահաբեկում և խոշտանգում էին:
Ավելի լավ է ուշ, քան երբեք:
Ուզում եմ հավատալ, որ իրավատեր եք, ոչ թե սպառող, և դանակը հասել է Ձեր ոսկորին:
Երեկ ցույց էր:
«Քանի դեռ դերակատարներդ նույնն են, Դու փրկություն չունես»:
Սա Վարդան Պետրոսյանի խոսքերն են`
Հարթակում կանգնած կուսակցության անդամներին և նրանց անունից ելույթ ունեցողներին եթե չեք ճանաչում, տեղյա՞կ եք գոնե այդ կուսակցությունների մեկ ամսվա անցուդարձին:
Գոնե գիտե՞ք, որ Նաիրա Զոհրաբյանը կողմ է քվեարկել 2010 թվականին այդ կենսաթոշակային ռեֆորմի օրենքին:
Վերջերս կատարվեցին խորհրդանշական նաև մի քանի իրադարձություն այդ 4 խմբակցություններից որոշների շուրջ:
Սահմանադրական դատարան դիմելու փաստը, որը խորհրդարանի 4 խմբակցությունը կատարեցին, ավելի անհասկանալի դարձրեց վիճակը:
Սահմանադրական դատարանը երբևէ իր ստեղծման օրվանից չի պաշտպանել օրինականությունը: Նա միշտ սպասարկել է այդ պահին իշխող ուժի կարիքները: