Աշխարհահռչակ կինոռեժիսոր Ֆելինին այսօր կդառնար 93 տարեկան

Աշխարհահռչակ իտալացի կինոռեժիսոր Ֆեդերիկո Ֆելինին (1920 թ.-ի հունվարի 20-1993թ.-ի հոկտեմբերի 31) տարբերվում էր իր յուրօրինակ ոճով` միաձուլելով երևակայական աշխարհներն ու բարոկկո ոճի տեսարանները: Կինոարվեստի աշխարհում նա 20-րդ դարի ամենաազդեցիկ մարդկանցից մեկն էր: Ֆելինին հինգ անգամ արժանացել է «Օսկար» մրցանակի: Ընդհանուր առմամբ, նա 25 ֆիլմի ռեժիսոր ու 51 ֆիլմի սցենարիստ է: 

Մինչև համաշխարհային հռչակ ձեռք բերելը, նա նկարում էր թերթերի ու ամսագրերի համար, գրում կուպլետներ ու որոշ ռադիոհոլովակների համար սցենարներ ու գովազդային տեքստեր շարադրում:
Ֆելինին նշում էր, որ իր նպատակը իր աշխատանքով մարդկանց երջանկացնելն էր: 

Ֆելինին ասել է`

♦ «Եթե լռությունը մի փոքր ավելի շատ լիներ, եթե մենք բոլորս մի պահ լռեինք… միգուցե մենք ինչ-որ բան կարողանայինք հասկանալ»:

 ♦ «Անկախ նրանից, թե ինչ է պատահում, միշտ պահիր մանկական անմեղությունդ: Դա ամենակարևոր բանն է»:

♦ «Չկա վերջ, չկա սկիզբ, կա միայն կյանքի անվերջանալի կիրքը»:

♦ «Միայն աշխատանքս կատարելիս է, որ ես ինձ իսկապես կենդանի եմ զգում»:

♦ «Փորձառությունն այն բանն է, ինչը դու գտնում ես, մինչ այլ բան ես փնտրում»:

Ասույթներ Ֆելինիի ֆիլմերից`

♦ «Երջանկությունն այն է, երբ կարողանում ես ճշմարտությունն ասել՝ առանց ինչ-որ մեկին վիրավորելու»: «8 ½»

♦ «Ընդունիր ինձ այնպիսին, ինչպիսին ես կամ, միայն այդ դեպքում մենք կարող ենք իսկապես բացահայտել միմյանց»: «8 ½»

♦ «Նրան, ում չի հետաքրքրում արվեստը, չի հետաքրքրում կյանքը»: «Մայրիկի բալիկները»

♦ «Ինձ չի հետաքրքրում քո առաջարկած մեծահոգությունը, այլ միայն իմ հոգու փրկությունը»: «Ջուլիետան և հոգիները»

Նրա` ավելի քան 60 տարբեր մրցանակների արժանացած օսկարակիր «Ճանապարհը» ֆիլմը կարող եք դիտել այստեղ: