Իրանի արտգործնախարարն առաջիկա օրերին կայցելի Սիրիա. ԶԼՄ-ներ

1in.am-ը գրում է.

Ներկայում Իրանի արտգործնախարար Մուհամմադ Ջավադ Զարիֆը գտնվում է Լիբանանի մայրաքաղաք Բեյրութում, որտեղ այցելել էր կիրակի՝ մերձավորարևելյան երկրներով աշխատանքային այցի շրջանակում:

RIA Novosti-ն՝ հղում անելով իրանական ԶԼՄ-ներին, հայտնում է, որ Բեյրութից հետո Իրանի արտգործնախարարը կայցելի Իրաք և Հորդանան, իսկ այնուհետև՝ Դամասկոս:

Ավելի վաղ ԱՄՆ պետքարտուղար Ջոն Քերին հայտարարել էր, որ Իրանը կարող է կարևոր դեր խաղալ սիրիական ճգնաժամի լուծման գործում, սակայն միայն որպես «Ժնև 2» համաժողովի ոչ պաշտոնական մասնակից: Համաժողովը ծրագրված է հունվարի 22-ին:

Քերին դա բացատրել է նրանով, որ Իրանը չի ընդունել պայմանավորվածությունները, որոնք ձեռք էին բերվել 2012-ին կայացած «Ժնև-1»-ում:

Հաղորդվել է, որ Իրանի մասնակցության հնարավոր պայմաններից մեկը կարող է դառնալ ռմբակոծությունների դադարեցման և մարդասիրական միջանցքի բացման մասին ուղերձը պաշտոնական Դամասկոսին:

Իրանի իշխանությունները վճռականորեն տրամադրված են մասնակցության, սակայն հրաժարվում են ընդունել որևէ նախապայման:

Ինչպես սպասվում է՝ Ռուսաստանի արտգործնախարար Սերգեյ Լավրովն ու ԱՄՆ պետքարտուղար Ջոն Քերին հունվարի 13-ին երկկողմ հանդիպման ընթացքում կքննարկեն «Ժնև-2»-ում Իրանի մասնակցության հարցը: