Մինչև 2035 թ. մեքենաների 9 %-ն առանց վարորդների կերթևեկի

1in.am-ը գրում է.

Ինքնուրույն երթևեկել կարողացող մեքենաների վաճառքը երկու տասնամյակ անց մեքենաների ընդհանուր վաճառքի 9 %-ը կկազմի: Այս եզրակացությանն են եկել ամերիկյան IHS Automotive կորպորացիայի վերլուծաբանները: 

Ընկերության մասնագետների ուսումնասիրությունները կենտրոնացած են եղել հենց ինքնավար մեքենաների վրա: Դրանք ստանդարտ իրավիճակներում այնպես կկողմնորոշվեն, որ վարորդը կարող է գործընթացին չհետևել, հաղորդում է HIS-ի վերլուծաբան Էգիլ Յուլիուսենը: Նման մեքենաներ ներկա պահին վաճառքում չկան, սակայն մի քանի տարի անց դրանք արդեն հնարավոր կլինի ձեռք բերել այնպես, ինչպես սովորական մեքենաները, գրում է Reuters գործակալությունը: 

IHS Automotive-ը կարծում է, որ այդ մեքենաների համաշխարհային վաճառքը 2025 թ. մոտ 230 000 կկազմի, որն էլ ընդհանուր ծավալի 1 %-ն է: Կանխատեսումների համաձայն՝ նշված տարում աշխարհում 115 միլիոն նոր մեքենաներ կիրացվեն: 

2035 թ. «անօդաչու» մեքենաների վաճառքի ընդհանուր ծավալն արդեն 9 % կկազմի: Վաճառքի մեծ մասը զարգացած շուկաներին բաժին կհասնի, ինչպիսիք են ԱՄՆ-ն, Արևմտյան Եվրոպան և Ճապոնիան: