Հունվարի 13-ին Լավրովը և Քերին կքննարկեն Իրանի դերը` Սիրիայում իրավիճակի կարգավորման հարցում

1in.am-ը գրում է.

ՌԴ ԱԳ նախարար Սերգեյ Լավրովը և ԱՄՆ պետքարտուղար Ջոն Քերին հունվարի 13-ին կայանալիք հանդիպման ընթացքում կքննարկեն Իրանի դերը Սիրիայի վերաբերյալ առաջիկա խաղաղարար համաժողովի ընթացքում: Այս մասին գրում է ITAR-TASS-ը:

«ԱՄՆ պետքարտուղար Ջոն Քերին և Ռուսաստանի արտաքին գործերի նախարար Սերգեյ Լավրովը հունվարի 13-ին կհանդիպեն, և մենք հույս ունենք, որ նրանք պայմանավորվածություն ձեռք կբերեն Իրանի մասնակցության վերաբերյալ»,- ասել է ՄԱԿ-ի գլխավոր քարտուղարի պաշտոնական ներկայացուցչի տեղակալ Ֆարհան Հաքը:

Ավելի վաղ հայտնի էր դարձել, որ վերոնշյալ հանդիպումը տեղի կունենա Փարիզում:

Ֆարհան Հաքն ընդգծել է, որ ՄԱԿ-ի գլխավոր քարտուղար Պան Գի Մունը կողմ է Իրանին հրավիրելուն, սակայն այդ մասին վերջնական որոշում դեռևս ընդունված չէ և այն թողնվում է «Ժնև-2» համաժողովը նախաձեռնողներին` ՌԴ-ին և ԱՄՆ-ին: Հաքի խոսքերով` օրվա ընթացքում համաշխարհային կազմակերպությունը հանդես կգա վերոնշյալ իրավիճակի հետ կապված հայտարարությամբ: