Ասում են՝ յուրաքանչյուր մարդու երջանկություն թաքնված է իր սրտում և գիտակցության մեջ: Կբացահայտե՞ս մեկ օր այն՝ լավ, չես բացահայտի՝ մեղքը քոնն է…Ինչևէ, դերասանուհի Արմինե Պողոսյանը թեև մի փոքր ուշ, բայց ամբողջությամբ, առանց պատառիկների բացահայտեց իր կյանքի երջանկությունը: Life.panorama.am-ի հետ զրույցում նա կիսվեց տոնական անցուդարձի, երազանքների ու նպատակների, այցելած սիրո ու տարիքային տարբերության մասին…
-Ինչպե՞ս անցկացրեցիք ամանորը:
-Շատ լավ: Անցկացրել եմ ամուսնուս և ծնողներիս հետ:
-Արդեն ամուսնացե՞լ եք: Ես գիտեի՝ ամռանը պետք է կայանա ձեր հարսանիքը:
-Դուք ճիշտ գիտեք, դեռևս մեր հարաբերությունները չենք օրինականացրել: Իսկապես, հարսանիքը կլինի ամռան սկզբին:
-Մտածե՞լ եք ինչպես կազմակերպել… Ավանդական հարսանիք կլինի, թե՞…
-Դեռ չենք որոշել, բայց, կարծում եմ, համեստ, գեղեցիկ, ինչու ոչ՝ ավանդական հարսանիք կլինի: Շքեղություն չեմ սիրում…
-Արմինե, ինչո՞վ է զբաղվում ձեր ամուսինը:
-Գործարար է:
-Ձեր միջև տարիքային բավական տարբերություն կա, արդյոք դա չի խանգարում, որ միմյանց ճիշտ հասկանաք:
-Այո, ամուսինս ինձանից մեծ է 28 տարով: Գիտեք, եթե սեր և հարգանք կա, տարիքը ոչ մի դեր չի խաղում: Այն տղամարդը, ով գիտի կնոջը սիրել և գնահատել, տարիքային տարբերությունը չեզոքացնում է: Ամեն դեպքում, ես դեռ այդ տարբերությունը չեմ զգացել:
-Իսկ ընտանիքում ձեր ընտրությանը դեմ չեղա՞ն:
-Ո՛չ: Ընտանիքս՝ հարգելով իմ ընտրությունը, և գիտակցելով, որ ես փոքր չեմ՝ չընդդիմացավ… Եվ ես ճիշտ ընտրություն կատարեցի. ունեմ հրաշք, կատարյալ ամուսին…
-Նա որտե՞ղ է բնակվում:
-Եվ Հայաստանում, և՛ ԱՄՆ-ում…
-Կարծեք թե տոնական անցուդարձից շեղվեցինք. այսօր Սուրբ Ծննդյան տոնն է: Առավել կարևորում եք նոր տարվա՞, թե՞ Սուրբ Ծննդյան խորհուրդը:
-Երկու տոներն էլ կարևոր են ինձ համար: Քրիստոնյա ենք, և Սուրբ Ծննդյան խորհուրդը կարևոր է մեզ համար, որպեսզի լինենք ազնիվ և մաքուր: Հավատում և առաջնորդվում եմ այդ խորհրդով: Երեկ երեկոյան առիթ ունեցա տեսնել, թե մեր ժողովուրդն ինչքան կարիք ունի եկեղեցի գնալու, աղոթելու և հանգստանալու տիրոջ տանը: Ուրախ եմ, որ այդ խորհուրդը պահպանում ենք… Իսկ ամանորն ինձ համար հրաշքների տոն է: Սիրում և հավատում եմ հրաշքներին: Անցած տարվա ամանորյա հրաշքը կատարվեց, նշանակում է՝ խորհուրդ կա այդ հրաշքի մեջ ևս:
-Իսկ ո՞րն էր նախորդ տարվա ձեր ամանորյա աղոթքը:
-… Ես գտա իմ կյանքի տղամարդուն…
-Այս տարի և՞ս սպասում եք հրաշքի: Ի դեպ, ունեք երազանք, որի իրականացմանը կյանքում ամենից շատն եք սպասում:
-Իհարկե, այս տարի ևս հրաշքի եմ սպասում, բայց չեմ բարձրաձայնի, որպեսզի կատարվի… Իսկ կյանքի նպատակ դարձած երազանք անպայման ունեմ, բայց ցանկանում եմ իրականանա, նոր բարձրաձայնեմ դրա մասին…