Գևորգ Ղազարյանը չգրավեց հետնապահ «Այնտրախտ»-ի սիրտը. ակումբը պայմանագիր չի կնքի

Armsport.am-ը գրում է.

Հայաստանի հավաքականի կիսապաշտպան Գեւորգ Ղազարյանի փորձաշրջանը գերմանական «Այնտրախտում» (Բրաունշվեյգ) բավական կարճ տեւեց: Braunschweiger-zeitung.de-ն հայտնում է, որ Ղազարյանի հետ գերմանական ակումբը պայմանագիր չի կնքելու:

«Այնտրախտի» մարզիչ Տորստեն Լիեբերկնեխտը հայտնել է, որ իրենք շարունակելու են հետեւել Գեւորգի խաղին. «Այն փաստը, որ նա հանդիսանում է Հայաստանի հավաքականի խաղացող, շատ բան է ասում նրա որակների մասին: Նա տեխնիկապես լավ պատրաստված խաղացող է: Մենք շարունակելու ենք հետեւել նրան»:

Երեկ, գերմանական ԶԼՄ-ներում հայտնվեց տեղեկություն, որ Ղազարյանն առաջին մարզումն է անցկացրել «Այնտրախտում»: Վերջինս շուտով մեկնելու է Իսպանիա, որտեղ կանցկացնի ուսումնամարզական հավաք:

Հիշեցնենք, որ 2013 թվականի ամռանը Գեւորգ Ղազարյանը համալրեց ղազախական «Շախտյորի» կազմը, սակայն դեկտեմբերին տեղեկություն հայտնվեց, որ նա չի շարունակելու կարիերան այդ թիմում: