Օբամային կվրդովեցնի այն, թե ինչպես վարվեցին իմ որդու հետ. Շանթ Հարությունյանի հայր

1in.am-ը գրում է.

«Առաջին լրատվական»-ի զրուցակիցն է «Ցեղակրոն» կուսակցության առաջնորդ, «7-ի գործով» նախկին մեղադրյալ Շանթ Հարությունյանի հայրը՝ Շահեն Հարությունյանը:

- Պարոն Հարությունյան, օրեր առաջ մեզ հետ զրույցում ասացիք, որ պատրաստվում եք Ձեր որդու հարցով դիմել ԱՄՆ նախագահ Բարաք Օբամային, դիմեցի՞ք:

- Գրել եմ, մի լավ անգլերեն իմացող կա, պետք է թարգմանի, նոր ուղարկեմ: Մի քանի օր հետո կուղարկեմ:

- Իսկ ի՞նչ բովանդակություն ունի Ձեր նամակը:

- Ընդհանուր առմամբ այն է, որ Հայաստանում իշխող անարդար վիճակը, բռնությունները՝ այս բոլորն իմ տղային՝ Շանթ Հարությունյանին դրդեցին դուրս գալ այդ ամենի դեմ: Մոտավորապես այս բովանդակությամբ բողոք է, որովհետև մեր ընտանիքի նկատմամբ հիմնականում Ռուսաստանի կողմից հալածանքներ եղել են, բոլորը գիտեն այդ մասին:

- Իսկ ի՞նչ եք պահանջում Բարաք Օբամայից:

- Ես չեմ կարող կռահել, թե ինչ վերաբերմունք ցույց կտա Օբաման, կարծում եմ նրան կվրդովեցնի: Վերջիվերջո ես շուրջ 30 տարվա իրենց քաղաքացին եմ, իմ մասին գիտեն, գիտեն թե ինչ պայմաններում եմ եկել այս երկիր, մեր ընտանիքի մասին էլ գիտեն: Չգիտեմ՝ ինչ վերաբերմունք ցույց կտան: Ես չեմ բավարարվում միայն Օբամային դիմելով, միջազգային կազմակերպություններին, ինձ ծանոթ կոնգրեսականներին ևս կդիմեմ:

- Ասացիք, թե կարծում եք Օբամային կվրդովեցնի, ի՞նչ նկատի ունեք՝ կրդովեցնի ինչպես են վարվել Ձեր որդու հե՞տ՝ նրան ձերբակալելը՞:

- Այո՛, դա նկատի ունեմ:

- Իսկ միջազգային կազմակերպություններից ի՞նչ եք ակնկալում:

- Ես շատ ակնկալիքներ ունեմ,«Amnesty international»-ին կդիմեմ, միջազգային Կարմիր խաչին կդիմեմ:

- Ձեր որդու նկատմամբ արդեն իսկ քրեական գործ է հարուցվել. շատերը նրան մեղադրում են բռնության հայտարարություններ հնչեցնելու մեջ:

- Գիտեք, ինքը շատ էմոցիոնալ անձնավորություն է: Ես չեմ կարող իր էմոցիոնալ վիճակը մեկնաբանել:

- Եթե լինեիք Հայաստանում, այս վիճակը տեսնելով՝ կվարվեի՞ք այնպես, ինչպես Ձեր որդին վարվեց:

- Տվյալ իրադրության մեջ չգիտեմ ինչպես կվարվեի:

- Ամեն դեպքում չե՞ք բացառում:

- Չգիտեմ, չեմ կարող ասել:

- Ձեր որդին ասում է, որ միայն հեղափոխությունը կփրկի Հայաստանը: Փաստորեն դրա իրականացումը ձախողվեց, այլ տարբերակներ տեսնո՞ւմ եք:

- Այլ տարբերակ գոյություն չունի: Ես պնդում եմ, որ միայն հեղափոխություն իրականացնելով կարելի է հասնել հաջողության: