Հայերս ամեն բանի մեջ complicado ենք. ԻՐ և ՆՐԱ :)
18:19 , 10 նոյեմբեր, 2013
- Հայերս ամէն բանի մէջ complicado ենք,- ըսաւ Հայերէն սորվիլ ուզող տիկին մը, երբ իմացաւ որ անձնական դերանունի Գ. դէմքի համար ունինք երկու տարբերակ,- եթէ կա՛մ ԻՐ եւ կա՛մ ԱՆՈՐ ըսենք ի՛նչ կ՛ըլլայ...
- Բան չ՛ըլլար,- ըսի փափկասուն տիկնոջ,- եթէ համաձայնիս որ ամուսինդ երբեմն քեզ սիրէ եւ երբեմն դրացիին կինը...
- Ի՞նչ կ՛ըսես,- ըսաւ յօնքերը պռստած...
- Եթէ ըսեմ "Ամուսինդ կը սիրէ ԻՐ կինը", ապա ամուսինդ ՔԵԶ կը սիրէ, իսկ եթէ ըսեմ "Ամուսինդ կը սիրէ ԱՆՈՐ կինը", ապա ամուսինդ ՔԵԶ չէ՛ որ կը սիրէ, այլ՝ դրացիին կամ այլ մէկու մը կինը...
- Շա՜տ եաման ես,- ըսաւ ժպտալով...
- Եամանը ե՛ս չեմ, Հայերէնն է,- ըսի յաղթանակ տարած հրամանատարի մը վեհութեամբ...