«Սեպտեմբերի 30-ին կայացած կառավարության նիստին գործադիրի հավանությանն արժանացավ «Հայաստանի Հանրապետության 2020 թվականի պետական բյուջեի մասին» ՀՀ օրենքի նախագիծը և բյուջետային ուղերձ-բացատրագիրը, որը առաջիկայում կանցնի քննարկման փուլերով և մինչև բյուջետային տարվա սկիզբը կհաստատվի ԱԺ կողմից:
Առաջին հայացքից՝ ներկայացված բյուջեի փաթեթը աչքի է ընկնում առավել համարձակ մոտեցումներով, ինչը վերաբերում է հատկապես պետական բյուջեի ծախսերի և եկամուտների ծավալներին և կառուցվածքին:
Այնպես որ, եթե նախորդ տարվա բյուջեն պայմանական անվանել էինք «Զգուշավոր բյուջե 2019», ապա այս տարվա բյուջեն հավակնում է արժանանալ «Համարձակ բյուջե 2020» տիտղոսին:
Թե ինչո՞ւ ենք 2020 թվականի բյուջեն համարում համարձակ, և ի՞նչ «համ ու հոտ» ունի օրենքի նախագիծը, դեռևս շատ կքննարկվի, երբ նախագծի կառուցվածքի, հիմնական մոտեցումների և դրանից ակնկալվող արդյունքների մասին հնարավոր կլինի խոսել առավել նեղ, ոլորտային քննարկումների և վերլուծությունների ձևաչափով:
Սակայն այն ցուցանիշները, որոնք թիրախավորել է կառավարությունը, ակնհայտ համարձակություն են պարունակում: Այստեղ համարձակությունը նախ և առաջ վերաբերում է բյուջեի ծախսային ուղղություններին և դեֆիցիտին, որը, ի դեպ, կառավարության կողմից մոդելավորվել է այս տարվա հավելուրդի և ծախսերի ոչ բարձր կատարողականի ֆոնի վրա:
Ոմանք բյուջեի այս նախագծին տալիս են նաև «աննախադեպ» անվանումը, ինչը, կարծում ենք, այնքան էլ բնութագրական չէ, քանի որ յուրաքանչյուր տարի բյուջեի եկամտային և ծախսային մասը նախորդ տարվա համեմատ բարելավում է ունենում, և այդ բարելավումներից յուրաքանչյուրն էլ կարող էին հավակնել աննախադեպ համարվելու տիտղոսին:
Անդրադառնալով 2020 թվականի պետական բյուջեի հիմքերին, որոնք արտացոլված են բյուջետային ուղերձ-բացատրագրի մեջ, պետք է նշենք, որ կառավարության կողմից ցուցաբերված համարձակության համար հիմք են ծառայել բարեհաջող դասավորված տնտեսական զարգացումները»,-գրում է թերթը:
Նյութն ամբողջությամբ կարդացեք թերթի այսօրվա համարում:
