Hraparak.am-ը գրում է.
Դպրոցական աշակերտների նման Նիկոլ Փաշինյանի ներս մտնելուն պես` կառավարության անդամները ոտքի կանգնեցին, «դասղեկը» նստեց, իրենք էլ նստեցին, և սկսվեց կառավարության հերթական նիստը: Նիկոլ Փաշինյանը որոշեց հերթական անգամ նախաբան-ելույթով կամ, ինչպես ինքը նշեց, ուղերձով հանդես գալ` 2022 թվականի ՀՀ պետական բյուջեի նախագծի ընդունման առիթով: Եվ այդ շրջանակներում Փաշինյանը որոշեց, որ պետք է խոսի ապագայից, ինչ-որ դրական բաներից, ներքաղաքական ճգնաժամը հաղթահարելուց:
«Դեռևս հաղթահարված չեն համավարակի և 44-օրյա պատերազմի տնտեսական, սոցիալական ու անվտանգային աղետալի հետևանքները ու մարտահրավերները: 2021 թվականին տեղի ունեցած ԱԺ ընտրություններով հաղթահարվեց ներքաղաքական ճգնաժամը ու բավականին ամուր հիմքեր ստեղծվեցին համախմբման ու դեպի ապագա նայելու հայ ժողովրդի ձգտման համար», - ասաց նա:
Թե ինչ նկատի ունի նա, երբ նշում է, թե հաղթահարվել է ներքաղաքական ճգնաժամը, երբ ընդդիմությունը ԱԺ-ում ենթարկվում է հարձակման ու ծեծի իշխանության կողմից, դժվար է ասել:
Հետո նշեց, թե Հայաստանի քաղաքացիները ամեն օր պետք է զգան կառավարության կողմից իրականացվող միջոցառումների ազդեցությունն իրենց կյանքի վրա:
Ապա խոսեց անվտանգության ապահովումից, որն իր օրոք գրեթե իսպառ բացակայում է:
«Մեծ ուշադրություն ենք դարձնելու անվտանգության ապահովմանը՝ առանց որի հնարավոր չէ իրագործել երկարաժամկետ զարգացման նպատակները: Այս իմաստով կարևոր է ոչ միայն բանակի պաշտպանական կարողությունների արդիականացումը, այլև Հայաստանի շուրջ բարենպաստ արտաքին միջավայրի ձևավորումը, Հայաստանի, Արցախի և տարածաշրջանի համար խաղաղ զարգացման դարաշրջան բացելու օրակարգի հետևողական իրագործումը», - ասաց նա:
