News.am-ը գրում է․
Վատիկանը բողոք է ներկայացրել Իտալիայի դեմ՝ հոմոֆոբիայի դեմ օրինագծի հետ կապված՝ հայտարարելով, որ այն կարող է սահմանափակել Իտալիայում կաթոլիկ եկեղեցու կրոնական ազատությունը:
Բողոքը, որի մասին նախ հաղորդել է Corriere della Sera-ն եւ հաստատել է Վատիկանի պաշտոնական ներկայացուցիչը, հունիսի 17-ին Վատիկանի արտաքին գործերի նախարարի կողմից փոխանվել է Սուրբ Աթոռում Իտալիայի դեսպանությանը, հայտնել է Reuters-ը:
Բողոքը ուղղված է «Զանի օրինագծի» դեմ, որն այդպես է կոչվում ի պատիվ Ալեսանդրո Զանի՝ Դեմոկրատական կուսակցության ձախ կենտրոնամետ գեյ օրենսդրի: Այն ընդունվել է խորհրդարանի ստորին պալատում եւ այժմ քննարկվում է Սենատի հանձնաժողովում:
Վատիկանը կարծում է, որ օրենքը խախտում է 1929 թվականի Լատերանյան համաձայնագրերը, որոնց համաձայն Վատիկանը դարձել է ինքնիշխան պետություն, եւ որը ղեկավարում է նրա եւ Իտալիայի միջեւ հարաբերությունները:
Վատիկանը զգուշանում է, որ նույնասեռ ամուսնություններ չկատարելու, նույնասեռ զույգերի կողմից կաթոլիկ հաստատությունների միջոցով երեխաների որդեգրմանը դեմ լինելու կամ կաթոլիկ դպրոցներում գենդերային տեսության դասավանդումից հրաժարվելու դեպքում օրենքը կարող է հանգեցնել Իտալիայում եկեղեցու քրեականացմանը:
Չնայած Վատիկանը հաճախ դատապարտում է նույնասեռականների նկատմամբ խտրականությունն ու բռնությունը, այն նաեւ մտահոգություն է հայտնում ցանկացած գենդերային տեսության վերաբերյալ, որը վերացնում է տղամարդկանց եւ կանանց միջեւ տարբերությունները:
Ապրիլին Իտալիայի հռոմեա-կաթոլիկական եկեղեցու եպիսկոպոսները քննադատել են օրինագիծը՝ հայտարարելով, որ «խտրականության դեմ պայքարի մասին օրենքը չի կարող հետապնդել այդ նպատակը անհանդուրժողականության եւ տղամարդկանց եւ կանանց միջեւ տարբերության իրականություն լինելու մեջ կասկածի միջոցով»:
Եպիսկոպոսները հայտարարել են, որ օրենքում պատշաճ ուշադրություն չի դարձվում հետերոսեքսուալ զույգի «ընտանիքի յուրահատկությանը»:
