Shamshyan.com-ը գրում է․
Մայիսի 17-ին, ողբերգական դեպք է տեղի ունեցել Երևանում: Ժամը 22:15-ի սահմաններում Արտակարգ իրավիճակների նախարարության փրկարար ծառայության 9-11 օպերատիվ կառավարման կենտրոն ահազանգ է ստացվել, որ Մալաթիա-Սեբաստիա վարչական տարածքում՝ ՀՀ ՊՆ Ռազմական ոստիկանության հետնամասում անցնող ջրատարը քաղաքացի է ընկել:
Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ԱԻՆ ՓԾ հատուկ նշանակության փրկարարական աշխատանքների իրականացման կենտրոնի թիվ 15 փրկարարական ջոկատը՝ ջոկատի հրամանտար Սերգեյ Բիձյանի գլխավորությամբ:
Ժամանել է նաև ԱԻՆ ՓԾ թիվ 1 հրշեջ-փրկարարական ջոկատը՝ 1 մարտական հաշվարկով՝ օղակի հրամանատար Ադրանիկ Գևորգյանի գլխավորությամբ:
Ժամանել է նաև ԱԻՆ ՓԾ բժշկական ապահովման վարչության խումբը:
Օպերատիվորեն ժամանել է նաև Երևանի 1-03 շտապօգնության թիվ 61 բժիշկների հերթապահ խումբը՝ բժիշկ Հենրիկ Կյուրեղյանի և բուժքույր Նազիկ Խեչումյանի գլխավորությամբ:
Փրկարարները ոստիկանության Շենգավիթի և Մալաթիայի բաժնի ծառայողների հետ քաղաքացու ընկնելու վայրից մոտ 250 մետր հեռավորության վրա, հոսող ջրատարում հայտնաբերել են Երևանի բնակիչ, 55-ամյա Գագիկ Դարբինյանի դին: Փրկարարարների կողմից քաղաքացուն դուրս բերելուց հետո բժիշկն ու բուժքույրը արձանագրել են նրա մահը:
Տեղում ոստիկանության Մալաթիայի բաժնի պետ Անդրանիկ Մելոյանի հանձնարարականով ոստիկանության Մալաթիայի բաժնի հերթապահ մասի օրվա պատասխանատուն տեղեկությունը փոխանցել է Հայաստանի քննչական կոմիտեի Երևան քաղաքի Մալաթիա–Սեբաստիա քննչական բաժին, որտեղից ժամանում է քննչական խումբը:
Ոստիկաններն այս պահին սպասում են, որպեսզի դեպքի վայր ժամանի դատական բժիշկը:
Ըստ նախնական տեղեկությունների՝ ջրահեղձ եղած քաղաքացին իր 2 ընկերների հետ է այցելել նշված վայր և տեղի է ունեցել ողբերգական դեպքը:
Փաստի առթիվ քննչական բաժնում նյութեր են նախապատրաստվում: Ոստիկանությունն ու քննչական բաժինը պարզում են ջրահեղձ եղած քաղաքացու հետ նշված վայրում եղած անձանց ինքնությունը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
