Այսօր Կենտրոնի թաղապետարանի աշխատակիցները լրագրողներին պատմել են, որ թաղապետի տեղակալը վիճաբանություն է ունեցել աշխատակիցներից մեկի հետ և ծեծել է նրան: Այս պահին Tert.am-ը Կենտրոնի թաղապետարանի դիմաց է, սակայն թաղապետ Ավետ Պողոսյանի հրահանգով՝ լրագրողները ներս չեն կարող մտնել:
Տեղի ունեցածի մասին Tert.am-ը փորձեց տեղեկություն ճշտել Ավետ Պողոսյանից, սակայն վերջինիս հեռախոսն անջատված էր:
Tert.am-ը ՀՀ Ոստիկանության ԶԼՄ-ների հետ կապի բաժնի պետ Զարզանդ Գաբրիելյանից տեղեկացավ՝ Ոստիկանություն ահազանգ է ստացվել այն մասին, որ թաղապետարանում ծեծկռտուք է տեղի ունեցել: Այս պահին ոստիկանության ծառայողները դեպքի վայրում են՝ միջադեպի հանգամանքերը պարզելու:
Այս պահին լրագրողները թաղապետարանի ներսում են, սակայն որևէ մեկը պարզաբանում չի տալիս, թե ինչ է տեղի ունեցել:
Աշխատակիցներից մեկը լրագրողներին փոխանցեց, որ միջադեպի ժամանակ կողքի սենյակում է եղել, հրմշտոցի ձայներ է լսել, կահույք է կոտրվել, շտապ օգնության մեքենա է եկել:
Տեղակալ Արմեն Ազիզյանն այս պահին այդտեղ չէ, աշխատակիցները պնդեցին, որ մոտ մեկ ժամ առաջ դուրս է եկել և տեղեկություն չունեն, թե երբ է վերադառնալու:
Տեղի ունեցած միջադեպի սենյակում այս պահին քննարկումներ են ընթանում, որտեղ սակայն թույլ չի տրվում, որպեսզի լրագրողներն էլ մտնեն:
Միջադեպը տեղի էր ունեցել թաղապետի տեղակալ Արմեն Ազիզյանի և հողօգտագործման բաժնի պետ Մանուել Մարգարյանի միջև: Ոստիկանները ուսումնասիրությունից հետո դուրս եկան և փակեցին այն սենյակը, որտեղ ծեծկռտուք էր տեղի ունեցել: Որևէ մեկը պաշտոնական տեղեկություն չհայտնեց:
Մանրամասները ՝ տեսանյութում։
