Նիկոլ Փաշինյանը կառավարության նիստի սկզբում անդրադարձավ կորոնավիրուսի հետ կապված իրավիճակին, այդ թվում՝ քաղաքացիների պատվաստվելու կարևորությանը: Ինչպես փոխանցում է «Արմենպրես»-ը, Նիկոլ Փաշինյանը հիշեցրեց, որ ավելի քան մեկ տարի աշխարհն ապրում է համավարակի պայմաններում, ու ՀՀ կառավարության ռազմավարությունն ի սկզբանե եղել է հետևյալը՝ սովորել ապրել կորոնավիրուսի պայմաններում, այսինքն՝ բնականոն կյանքից մաքսիմալ պակաս շեղումներով:
«Պատերազմի պատճառով գուցե ուշադրություն չենք դարձրել պատվաստումներին, սակայն հիմա կա պատվաստման բավականին մեծ պոտենցիալ, բայց բախվում ենք մի խնդրի, որ այդ պոտենցիալը պատշաճ մակարդակով չի իրականացվում»,- ասաց նա։
Առողջապահության նախարարի պաշտոնակատար Անահիտ Ավանեսյանը նշեց, որ այսօր գրանցվել է կորոնավիրուսի 656 նոր դրական դեպք, 2000-ից ավելի վարակակիր գտնվում է հիվանդանոցներում: Վերջին օրվա ընթացքում գրանցվել է 16 մահ: Մահերի թիվն արդեն իսկ անցել է 4000-ը: Անահիտ Ավանեսյանն ընդգծեց, որ մեր երկրում հասանելի են պատվաստանյութերը 18 տարին լրացած քաղաքացիների համար:
Նախարարի պաշտոնակատարը հիշեցրեց, որ ապրիլի 28-ին ինքն ու փոխվարչապետի պաշտոնակատար Տիգրան Ավինյանը պատվաստվել են, ինքն իրեն լավ է զգում:
«Պատվաստումը այն միակ միջոցն է, որն օգնելու է վերջ դնելու մահերի աղետալի ընթացքին ու զսպելու հաջորդ աղետալի ընթացքին», - ասաց տիկին Ավանեսյանը:
Նիկոլ Փաշինյանն էլ ընդգծեց՝ պետք է սկսել իրենցից՝ մի շաբաթվա ընթացքում կառավարության բոլոր անդամները պետք է պատվաստվեն: «Եթե որևէ պատվաստանյութ ներկայացնի որևէ վտանգ քաղաքացիների առողջությանը, կյանքին, ՀՀ կառավարությունն ուղղակի այդ պատվաստանյութը չի ընդունի», - ասաց նա՝ հավելելով, որ շատ մեծ լրատվական շահարկումներ կան պատվաստանյութերի առումով:
«Ամենևին զարմանալի չէ այն արշավը, որ կա Հայաստանում, որովհետև պատվաստումների դեմ, ցավոք, վերջին տարիներին Հայաստանում շարժումներ են սկսվել, որոնք չգիտես, թե ինչ նպատակ ունեն: Մենք բոլորս պետք է պատվաստվենք: Այս պահի դրությամբ Հայաստանում պատվաստված է ընդամենը 2690 մարդ, ինչը խայտառակ ցածր ցուցանիշ է: Հիմա աշխարհում պատվաստվածների թիվը երկրի որակի նշան է բոլոր առումներով, այնպես որ՝ սա պետք է լինի մեր ամենօրյա աշխատանքը», - ասաց Նիկոլ Փաշինյանը՝ նկատելով, որ շուտով որևէ ճամփորդության համար պատվաստումը պետք է լինի պարտադիր:
Նա պատվաստվելը կարևորեց ոչ միայն Հայաստանից արտերկիր ճամփորդությունների, այնպես էլ մեր երկիր ժամանող զբոսաշրջիկների համար:
Ապրիլի 26-ին Հայաստան է ներկրվել ռուսական «Sputnik-V» պատվաստանյութի խմբաքանակ` 14000 անձի համար (առաջին բաղադրիչը): Մարտի 28-ին «COVAX FACILITY» նախաձեռնության միջոցով Հայաստան էր ներկրվել կորոնավիրուսային հիվանդության (COVID-19) դեմ «AstraZeneca» ընկերության պատվաստանյութի առաջին խմբաքանակը` 24 000 դեղաչափ: Իսկ ապրիլի 8-ին ներկրվել էր «Sputnik-V» պատվաստանյութի առաջին խմբաքանակը՝ 15 000 դեղաչափ` 7500 անձի համար։ Մայիսի առաջին շաբաթվա ընթացքում Հայաստանը կստանա 100 000 դեղաչափ Չինաստանից որպես նվիրատվություն սպասվող Sinovac ընկերության CoronaVac պատվաստանյութը:
