«Հարցազրույց Արցախի «Արդարություն» կուսակցության պատգամավոր Դավիթ Գալստյանի հետ
- Նիկոլ Փաշինյանի մարտիմեկյան հանրահավաքին, ասում են, Արցախից էլ են մարդ բերել, Դուք ունե՞ք նման տեղեկություն:
- Ճիշտն ասած՝ ես հստակ տեղեկություններ չունեմ, այո՛, օդում կախված լուրեր կան, ես էլ եմ լսել, որ մարդկանց են բերել, բայց չեմ կարող ո՛չ հերքել, ո՛չ հաստատել, կարծում եմ՝ ժամանակի ընթացքում այդ հարցն էլ կպարզվի:
- Նիկոլ Փաշինյանի հանրահավաքն ի՞նչ արձագանքներ է ստացել Արցախում, Դուք միշտ հայտարարում եք, որ Հայաստանի և Արցախի իշխանությունները միմյանց շաղկապված են, երբ Փաշինյանի դիրքերն ամրանում են, Արայիկ Հարությունյանն էլ այդտեղ է ուժեղանում: Հիմա ի՞նչ տրամադրություններ են:
- Այո, ուղիղ կապով, բազում թելերով կապված են: Ոչ վաղ անցյալում Նիկոլ Փաշինյանը հայտարարություն էր անում, այստեղի իշխանությունները շարունակում էին, ասում՝ ով Նիկոլ Փաշինյանի իշխանությունը չի ընդունում, ուրեմն նրանք դավադիր ուժեր են, և այդ «դավադիր ուժերի» հետ Արայիկ Հարությունյանը հանդիպում չէր ունենում: Բայց ուշագրավ է, որ վերջին շրջանում այստեղ այլևս նման հայտարարություններ չեն անում, նախկինի պես չեն հայտարարում, որ Նիկոլ Փաշինյանը ճիշտ է, ամենահայրենասեր ղեկավարն է Հայաստանի և այլն:
Հարությունյանն ակնհայտորեն պասիվացել է, և այլևս հավատարմության դրսևորումներ չկան նրա կողմից, ինչը ևս մեկ ապացույց է, որ ԳՇ-ն, ի դեմս Օնիկ Գասպարյանի, ճիշտ է, Նիկոլ Փաշինյանը՝ սխալ:
2007 թվականից սկսած՝ Արայիկ Հարությունյանն Արցախում կառավարություն է ձևավորում, այդ ինչպես ստացվեց, որ Նիկոլ Փաշինյանը, մերժելով նախկիններին, Արայիկ Հարությունյանի իշխանությունը ողջունեց, շնորհավորեց և աշխատում է նրա հետ: Նրանք երկուսն էլ արդար չեն ժողովրդի հետ, Արայիկ Հարությունյանից ավելի նախկին չկա:
Դուք նկատեցիք, որ Նիկոլ Փաշինյանի հրավիրած հանրահավաքում «Նիկոլ, վարչապետ» էին վանկարկում, ինչն էր այդ հավաքի նպատակը, «Մարտի1-ի» հիշատակի հավաք անել, ծափ-ծիծաղով ու վանկարկել «Նիկոլ, վարչապետ»: Չի կարելի ժողովրդին մոլորեցնել, «Մարտի 1»-ի պատրվակով ժողովրդին հավաքել հրապարակում, հետո նման կոչեր պարտադրել: Իսկ զուգահեռ՝ Հայրենիքի փրկության շարժման հանրահավաքին «հայրենիքի փրկություն» ու «Հայաստան» էին բացականչում: Այսինքն՝ մենք Նիկոլի լինել-չլինելն ու Հայաստանի լինել-չլինելը դրել ենք մի հարթության վրա, կա՛մ Նիկոլը պիտի լինի, կա՛մ Հայաստանը, սա է իրենց ուզածը: Ժողովրդի մի մասն ուզում է, որ Հայաստանը լինի, մի մասը՝ Նիկոլը, ուստի պետք է կողմնորոշվեն՝ կա՛մ Հայաստանը պետք է լինի, կա՛մ Նիկոլը:
-Նիկոլ Փաշինյանը կրկին օրակարգ է բարձրացրել արտահերթ ընտրությունների հարցը, հնարավոր համարո՞ւմ եք, որ մայիսին, երբ լրանա Արայիկ Հարությունյանի պաշտոնավարման մեկ տարին, ինքն էլ գնա ընտրության:
-Ես կարծում եմ, որ այս հարցում էլ Փաշինյանը մանիպուլյացիա է անում, երբ տեղը նեղվում է, արտահերթ ընտրություններից է խոսում, երբ խաղաղ է, հանրության պահանջը հօգուտ իր շահերի է մեկնաբանում, թե իբր չկա նման պահանջ: Կողմնորոշվեք, տղերք, հիմա կա՞ հանրային պահանջ, թե՞ չկա: Նիկոլ Փաշինյանի իշխանությունը եթե նույն ոգևորությամբ, որ լծվեցին Հանրապետության հրապարակ մարդ բերելու գործին, մոտենար նաև հետպատերազմական խնդիրներին, ես համոզված եմ, որ բոլոր հարցերը լուծված կլինեին»,-գրում է թերթը:
Նյութն ամբողջությամբ կարդացեք թերթի այսօրվա համարում:
